KUCHING: Rega semin di Sarawak mar enti dibanding enggau Semenanjung ketegal barang mata dikena ngaga semin dibeli ari menua Thailand.

Sapit Kepala Menteri ti mega nyadi Menteri Pemansang Infrastruktur enggau Perengka Pengangkut Tan Sri James Jemut Masing madah bisi kebuah ti ngasuh rega semin ba nengeri tu mar.

“Bisi tiga barang mata dikena kitai ngaga semin baka klinker, batu kapur enggau gypsum.

“Gypsum tu sebagi ari perengka ti pemadu mar rega dikena ngaga semin laban diimport kitai ari menua Thailand lalu rega tu dijaga sida ba menua nya empu,” ku iya nerang.

Masing madah mansutka jaku nya lebuh dirandau pemberita ba pengawa Randau begulai enggau Nembiak Dayak Palan Pelajar Tinggi (IPT) Sarawak di Kampus Barat i-CATS ditu, tadi.

BEJAKU… Masing bejaku ngagai pemberita bekaul enggau rega semin di Kampus Barat i-CATS ditu tadi.

Nangkan nya, ku iya, ungkus perengka pengangkut dikena ngemai perengka import nya ke Sarawak nyadi sebagi ari kebuah ngasuh rega semin mar.

“Takah menua Semenanjung enggau Thailand enda jauh, nya alai ungkus perengka pengangkut sida enda besai dibanding enggau kitai ba Sarawak.

“Enti di Semenanjung, rega semin mudah laban sida din bisi mayuh kompeni besemekih bedagangka semin tu,” ku iya.

Masing mega madah, perintah Sarawak deka berandau enggau piak Cahaya Mata Sarawak (CMS) ngambika ulih mutarka penanggul tu.

“Jaku ti dipansutka Lim Guan Eng bekaul enggau rega semin nya endang amat, kita enda ulih nyakal pekara nya.

“Taja pia, tu deka diperunding enggau silik agi ngambika enda meri penanggul sereta ngenusah rayat ditu,” ku iya.

Kemari, Menteri Wang Malaysia, Lim Guan Eng madah rega semin di Sarawak jauh mar dibanding enggau Semenanjung.

Ba siti penerang berita, iya madahka pansik silik patut dikeluar nentuka pugu pekara ti ngasuh rega manggai nya tauka ketegal ulah menggi industri kediri di menua di Sarawak.

Guan Eng mega madah semin sebagi ari kereban dikena berumah lalu pekara tu balat nating rayat, mangka ekonomi enggau kuasa meli sida.