KUCHING: Sistem YS-Cams siti modul ti ditumbuhka dikena ngatur sereta proses pinta nengah online.

Sistem YS-Cams tu dipenyadika Kepala Menteri Sarawak Datuk Patinggi Abang Johari Tun Openg ditu.

Direktor Yayasan Sarawak Azmi Bujang madah nengah sistem tu, pengawa meri bantu deka lebih muntang sereta jampat.

“Nengah YS-Cams tu, pengawa meri bantu pinjau enggau biasiswa nembiak deka lebih muntang.

“Tu mega muka jalai ngagai ejensi perintah sereta opis perintah bekerejasama enggau Yayasan Sarawak,” ku iya.

Azmi madah munyi nya lebuh bejaku ba pengerami bejadika Sistem YA-Cams sereta Pengerami Ngintu Gawai Raya Yayasan Sarawak 2019 di Dewan Jamilah Yayasan Sarawak ditu, kemari.

Nangkan nya ku iya, modul i-GPS diti ari modul ti dipejalai ngena sistem YS-Cams.

“Naka ke diatu, urung 4,000 iku nembiak nampung pelajar luar Sarawak udah nerima inisiatif i-GPS tu enggau ungkus belanja RM 1.2 juta.

“Lalu apin lama ti udah mega, kami bisi nerima 677 iti pinta i-GPS tu,” ku iya.

Ku Azmi, nengah YS-Cams tu, pinta i-GPS deka muntang diatur ari ngelama tu.

Sama ngulu pengerami nya bini Kepala Menteri Datuk Amar Juma’ani Tuanku Bujang, Sapit Sekretari Perintah Nengeri Datuk Mohammad Abu Bakar Marzuki, Sapit Sekretari Perintah Nengeri Datuk Sabariah Putit, Kaban Parlimen Petra Jaya Datuk Seri Fadillah Yusof sereta Kaban Kunsil Nengeri (Adun) Tupong Fazruddin Abdul Rahman.

BEJADI… Kepala Menteri Datuk Patinggi Abang Johari bejadika sistem YS-Cams di Dewan Jamilah Yayasan Sarawak ditu, kemari.