KUCHING: Pelajar nyadi reta chukup berega ungkup pemansang menua, nya kebuah Opis Wang Turu Pelajar Tinggi Nasional (PTPTN) keran mantu nembiak nampung pelajar ngagai tikas tinggi agi.

Ku Direktor Opis Pelajar Nengeri Sarawak Dr. Azhar Ahmad, pelajar tu beguna amat ba pengawa kitai nempa nembiak ti menyana dudi hari.

“Kitai enda tau nagang pengingin bala nembiak ti bisi ati nampung pelajar sida.

“Kitai mega ulih berati ninting taun penyulut ba pemutus peresa sekula primari enggau sekondari majak nambah ke alai pemayuh tubuh sida ti nampung pelajar mega nambah,” ku iya nerang.

Teks jaku iya dibacha Sapit Direktor Unit Pengatur Pekara Nembiak Opsi Pelajar Nengeri Sarawak Abang Jamali Abang Sa rambau Program Ngerami Bakih PTPTN Nengeri Sarawak 2019 ditu tadi.

Nangkan nya ku iya, perintah nadai kala limpang tang seruran nyendiaka bantu ngagai bala nembiak ti deka nampung pelajar kelebih agi ba pekara belanja.

“PTPTN ditumbuh nyadi sebengkah ejensi menggi pangku pengawa mantu mayar bayar pelajar nengah pinjau.

“Jalai alternatif disediaka sida sekali tu iya nya minta mensia mayuh sama besimpanka belanja ba Skim Simpan Pelajar Nasional (SSPN),” ku iya nerang silik.

Kelimpah ari nya, chara PTPTN meransang mensia mayuh besimpanka belanja tu patut diterima kitai enggau ati lantang.

“Kitai enda tau ngumbai PTPTN tu nyadi sebuah palan meri pinjau tauka ngutang tang patut beratika pemanah pengawa sida, wang turu pelajar rayat Malaysia.

“SSPN nyadi pengelebih rayat menua tu laban bisi endur minjau ti belalauka atur syariah,” ku iya nampung.

Ku Azhar, mayuh pengelebih diberi nyengkaum apai indai ti nyimpan belanja dia laban sida deka dikelaung ari chukai taksiran manggai RM 8,000 setaun.

“Semua piak patut ngaul kerejasama rat nerenak ulah ngelimat enggau nyimpan belanja ungkup pelajar sereta penabat dudi hari.

“Rayat Sarawak mega diperansang ngerebut peluang ti manah tu,” ku iya madah nyemetak.

NIBAK JAKU… Abang Jamali macha teks jaku Direktor Opis Pelajar Nengeri Sarawak Dr. Azhar Ahmad rambau Program Ngerami Bakih PTPTN Nengeri Sarawak 2019 di Pustaka Nengeri tadi.