KUCHING: Sepenyampau 22,580 peranak nengeri tu enda mayar pinjau sida ngagai Opis Wang Turu Pelajar Tinggi Nasional (PTPTN).

Menijar Besai PTPTN Yussuf Chif madahka penyampau tubuh tu urung 30.4 peratus ari sida ti minjau ba PTPTN.

“Ba Sarawak, sepenyampau 74,278 bisi minjau ba PTPTN kelebih agi sida ti nampung pelajar.

“Ari penyampau tu, semina 51,698 tauka 69.8 peratus aja udah mujur mayar pinjau sida ngagai PTPTN,” ku iya.

Yussuf mansutka jaku nya rambau Program Ngerami Bakih PTPTN Nengeri Sarawak 2019 di Dewan Pustaka Nengeri Sarawak ditu, tadi.

NERANG… Yussuf bejaku ba mua mayuh rambau atur Program Ngerami Bakih PTPTN Nengeri Sarawak 2019 di Dewan Pustaka Nengeri ditu tadi.

Nangkan nya ku iya, pinjau PTPTN tu endang patut dibayar nentuka gerempung wang turu nya semampai ulih meri pinjau ngagai nembiak bukai.

“Duit ti dipinjau endang patut dibayar laban kami mega nginjau ari ejensi bukai.

“Enti pinjau enda dibayar deka nating sereta ngasuh kami napi pemar mayar pinjau ejensi bukai lalu nembiak baru mega enda ulih nginjau,” ku iya nerang silik.

Kelimpah ari nya ku Yussuf, sida mega keran nerenakka ulah ngelimat enggau besimpanka belanja ba akaun Skim Simpan Pelajar Nasional (SSPN).

“Tu sebagi ari chara nyimpan belanja ti meruan sereta dikemendarka Opis Menteri Pelajar Malaysia (KPM).

“Kami enggaika rayat kelalu bepanggai ba duit pinjau,” ku iya madah nyemetak.

Berebak enggau nya, pengawa nyuaka Anugerah Bakih Pemadu Nyulut 2018, Anugerah Kategori Komisen Pemadu Tinggi 2018 enggau ke bukai.

Sama datai Sapit Direktor Pengatur Pekara Nembiak Opis Pelajar Nengeri Sarawak Abang Jamali Abang Sa ti ngarika Direktor Opis Pelajar Nengeri Sarawak Dr. Azhar Ahmad, Prinsipal SMK Asajaya Wong Nguk Chin, Ketuai Bagi Korporat Komunikasyen Sarawak Energy Berhad Mohammad Rafiq sereta bala pengari ejensi bukai.