Kus Ngaga Kuih

SRI AMAN: Sepenyampau 43 iku kaban Biro Indu Kampung Panggil/Klauh ditu ngulu Kus Ngaga Kuih nadai bebayar diatur raban Gerempung Indu Dayak Sri Aman (Gidsa) kena 22 Jun tu tadi.

Nitih ku penerang ari Chairman Gidsa, Bonie Langkop, batang tuju kus tu dikena ngiri penemu, ngajar enggau ngembing raban indu kelebih agi sida ti diau di rumah panjai ngena penemu ngaga kuih.

“Ari kus tu sida diajar chara ti betul ngelumai tepung sereta pekara pemeresi ti dikemerat nentuka produk digaga sida likun diempu.

“Sida mega bisi diterang pasal standard pemakai, chara nungkus enggau chara ngelakuka dagang enti sema sida deka ngepunka dagang kuih dikena nambahka penatai pemisi ruang bilik,” ku Bonie ngelansa tuju kus nipakka tuju enggau juluk penumbuh Gidsa.

Nangkan nya ku Bonie, kus ti diatur dikearap meri pemaik ngagai sida kelimpah meri seling penemu pasal dagang pemakai ti majak ngerembai enggau nerima peminta di menua tu.

NERANG… Yen bekunsika chara nyendiaka kereban, mela, ngelumai tepung kena ngaga kuih.

“Kitai indu anang sanggu sereta nangi enti deka teulihka pemujur ba dagang pemakai laban bisi peluang besai dikemansang enggau dikerembai ari peminta kemaya hari.

“Enda ibuh besai, dagang tau dipun enggau bejual kuih ba tamu tauka endur ti dikemendar bedagang baka kantin sekula enggau ke bukai.

“Teladan sida ti udah mujur lalu anang enggai betanya, minta sanding penemu ari sida ti bepenau enggau bepeneleba ba dagang kelebih agi ngaul pemakai,” ku Bonie meransang.

Sekretari Gidsa Yen Jebeni mega bisi nangkan bala penyereta kus anang masau penemu diulih sida laban tau dipujur nyadi batang pengawa sereta nyungkak ekonomi nengah pengawa dagang.

Ku Yen, kitai indu bisi pengelebih ba pengawa ngintu enggau mela pemakai laban endang udah nyadi batang pengawa kitai kenyau ari angkat dara, dilatih enggau diajar sida ke tuai.

NGASIKA AJAR… Bonie (duduk) begulai enggau bala penyereta kus nunjukka asil kuih digaga sida.

“Nya kebuah besai amat pengandal aku deka meda kitai ke bisi ngulu kus tu maju sereta nyingkang ke mua nunda bansa bukai ti udah dulu mansang.

“Kitai indu rumah panjai mayuh awak pengudah lepa ari pengawa di bilik, enti enda beranyam, nenun, nusuk manik tauka pengelandik jari bukai, kitai tau bedagangka kuih sebelah rumah panjai sereta ngelawa rumah panjai bukai.

“Pama mih bulih sesen dua ari ke nadai laban kitai udah beratika dagang kuih tu bisi pengulih besai, enda ibuh ngiga untung besai dulu, tegapka dagang lalu kita deka nyapai pemujur jemah,” tandu Yen.

Berebak enggau nya, bala penyereta mega bisi nerima setipikit enggau lantang ati pulai ngemai asil kuih ti digaga ari kus nya seraya meri terima kasih ngagai Gidsa ti udah kiruh nangkup peminta sida.

 

ENGGI AKU… SIku penyereta gagit nunjukka pemanah kuih digaga iya ngagai Suara Sarawak.

 

NYINUK… Bala penyereta kus benung beratika penerang enggau ajar ari bala pengatur kus.

 

NITIH STANDARD… Entara kuih digaga bela penyereta kus diatur Gidsa ungkup Biro Indu Kampung Pangil/Klauh.