KOTA SAMARAHAN: Sepenyampau RM10.3 juta pengerugi ngaul kes Macau Scam dirikod sepanjai taun 2018 di Sarawak.

Menteri Muda E-Dagang Datuk Mohd Naroden Majais madahka tu nyengkaum 209 kes seraya 49 kes udah ditan.

“Enda ulih dikenggai, agi tubah sida ti enda sedar sereta enda nemu pasal ulah nipu chara online tu.

“Nya kebuah sida dilalau enda mantaika penerang diri tauka lumur telefon sebelah media rama nyeliahka diri kena tipu,” ku iya nangkan.

Naroden mansutka jaku nya lebuh nutup ‘Staying Safe Online Campaign 2019’ di Dewan Suarah Kota Samarahan ditu tadi.

DIPEBASA… Naroden (tengah) bejadika Kimpin ‘Staying Safe Online’ 2019 di Dewan Suarah Kota Samarahan ditu, kemari.

Nangkan nya ku iya, mayuh pekara ulih dikereja ngena jalai muntang sereta jampat kelebih agi nengah pemansang teknologi kemaya hari.

“Nengah kimpin tu, kitai ulih bekunsi penemu enggau penerang pasal penyalah nipu online nentuka mensia mayuh sedarka pemesai pangka ari ulah baka tu,” terang iya.

Berebak enggau nya, Sapit Ketuai Opis Pansik Jenayah Komersial Kontinjen Sarawak DSP Maria Rasid madah sepenyampau RM51 juta pengerugi dirikod nyadi ngaul kes African Scam tauka Love Scam kenyau ari 1 Januari ngagai 23 June taun tu.

Ku iya, tu nyengkaum 49 kes dirikod nyadi genap bagi menua ba nengeri tu.

Taun tu aja ku Maria, sepenyampau RM3.97 juta pengerugi dirikod nyadi ngaul kes Macau Scam nyengkaum 64 kes ari genap bagi menua di Sarawak.

Sama datai Kaban Parlimen Kota Samarahan Rubiah Wang, Residen Samarahan Brahim Lumpu, Sekretari Mendam Opis Menteri E-Dagang Kameri Affandi, Pemesai Pelilih Samarahan Ainnie Wahab, Pemesai Pelilih Simunjan Abdul Khalid Manap sereta bala pengari ejensi enggau opis perintah ke bukai.