Serakup Ngasi Sarawak

KUCHING: Serakup Ngajat Asal Iban (Ngasi) Sarawak mujur ngatur bengkel ngaga gendang ungkup serap umur.

Kenu ku penerang ari Presiden Serakup Ngasi Sarawak, Ajat Sumoh, bengkel tu diatur berenggat laban enda ulih tembu sekali.

“Kami sebuat ngatur bengkel tu tiga renggat, berengkah ari melah lumpung kayu, nyayat enggau ngepat dataika iya nyadi gendang.

“Kesemua pengawa tu asil ari kerejasama begulai bala kaban Ngasi, ari ajar sida ti bepenau ba pengawa tu sereta pengangkun enggau pengepuh bala ngereja pengawa dataika tembu,” ku Ajat lebuh dirandau Suara Sarawak.

RIPIH PENGAWA… Lumpung kayu ti udah dipilih deka ditibak dulu.

Ku Ajat, bengkel ngaga gendang keterubah udah diatur kena 27 April ti ngaul pengawa milih bansa kayu ti manah digagaka gendang sereta ngelumpung kayu nitihka pemesai dikedeka.

Bengkel renggat kedua mujur diatur kena 12 Mei tu tadi enggau nampung pengawa melah mansap enggau maras lumpung kayu sereta nebuk lubang ba tengah tauka puak kayu nya.

“Bala kiruh amat sereta gagit nembuka gendang ari tengkebang jari diri empu lalu tu ukai pengawa ti muntang dikereja.

“Tambah mega tu setipak enggau juluk serakup deka ngajar enggau ngiri penemu ngambika bisi ditampung ngagai rebak dudi kelimpah ngaul sida ngelala main asal kitai bansa.

“Kitai mega nguji nerenakka ulah enggau chara gawa siti tim sereta ulih ngatika diri maya ngereja nengah pengawa seati enggau begempung, bisi tanggungpengawa enggau penaluk,” ku Ajat nerang sekeda tuju serakup sida.

NEMPA… Udah tembu ditibak, lumpung kayu deka digeran.

Nangkan nya, bengkel ngaga gendang renggat ketiga tauka kepenudi udah diatur 9 June tu tadi lalu sida mujur nembuka langkar gendang, semina lubang gendang bedau disengkabung ngena kulit jelu aja.

Kelimpah ari nya, raban Ngasi mega nibarka jaku gerah sekeda kelas main asal ti bisi diatur berengkah ari 14 Julai tu iya nya Kelas Gendang Pampat, Kelas Ngajat bagi indu, lelaki enggau nembiak mit sereta Kelas Taboh bagi indu enggau lelaki.

Kelas tu setipak enggau tuju Akademi Ngasi ngangkat enggau ngenan penulin main asal Iban lalu kelas tu nerima penyereta mensia mayuh.

Ajat ngarapka mayuh agi bala datai belajarka main asal tu nentuka iya pegari agi nama, jelai reta nyadika kelai bansa kitai.

Barang sapa bisi ati belajarka main asal diatur Akademi Ngasi Sarawak tau telefon ngagai Ajat empu ba lumur 0128747342, Nera (0138131387) enggau Fecy (0128846036).

NGELANGKAR… Udah tembu pengawa ngeran, sida belabuh mansap kayu ngaga langkar gendang.

 

NYAUKA TEMBU… Gaya langkar gendang ti udah ngeruang ba tengah tang apin disengkabung enggau dililit ngena kulit jelu.

 

TIM GENDANG PAMPAT… Ajat (tiga kanan) disempulang bala bukai ti nyadi tulang belakang pemujur kelas gendang pampat diatur Serakup Ngasi Sarawak ngelama tu.