SRI AMAN: Basa nganyanka penyiru enggau pementas kitai maya begulai bebaik enggau pangan diri patut diterenak ngagai rebak baru.

Penyelaras PKR Sri Aman Norina Umoi Utot madahka rebak baru ti deka nampung pengawa kitai jemah enda tau enda diajar enggau diseridi nunda ajar sida ke tuai ti ditampung kitai nyentuk diatu.

“Enti suba, sida ke tuai ngajar kitai ngena ajar Bungai Nuing, jaku ajar ti kasar sereta munyika ngelanjur tang chukup ngasi.

“Ba aku empu, jaku ajar bala ke tuai semampai dikeingat, nyadika lalau enggau tenggau ba pejalai pengidup kelebih agi maya belelang gawa ke menua tasik, jauh ari menua diri.

“Nya kebuah aku keran amat ngemai rebak baru belajar, mereti sereta ngasika jaku ajar apai indai, bala pengajar enggau sida ti tuai penemu, panjai runding, dulu makai garam,” ku Norina madah nyemetak.

TIMPAI KENANG… Insol nguluka Norina, Leon, Yen enggau Bonie sereta bala bukai begambar ungkup kenang lebuh datai ba laman rumah iya.

Iya mansutka jaku nya lebuh bejalai ngabang ngagai rumah Insol Harry di Bayai, Batu Lintang, Undop di Sri Aman ditu nyerumba Gawai Dayak taun tu tadi.

Nya alai ku Norina, beguna amat kitai ngembing bala nembiak kenyau ari mit laban umur maya nya sida ngasika jaku ajar lalu ulih nempa runding enggau ulah ti meruan.

Ku iya, enda ngawa kitai ti nyadi apai indai dulu belaya sereta beserekang penemu enggau sida, anang kelalu ngasi tauka nundukka bala anak tang kitai dekaka sida tu ditempa nyadi modal mensia ti menyana jemah.

“Kitai patut ngajar sida lebas mansutka penemu tauka jaku, anang baka nibarka jala enda betating, laban kitai bansa chukup siruka jaku lalu ulah ti salah patut dirara ngena silup jaku, ensuruk ngambi nadai ati ensiban, ringatka pangan diri.

“Pia mega maya kitai begulai, anang kelalu ngering diri tang patut bebatak asur, enti sema siku udah kering jaku, ke bukai tau nendurka diri, lara maya udah ati chelap laban kitai mensia tu munyi ku sempama, indah batu tungku pan tau besengki,” ku Norina nibak jaku lalau.

Norina mega muji pemanah basa tuai pengawa, Insol Harry, ti udah ngelalu penatai sida ngena basa chukup, ditiki ngena ai ansah, dinah macham bansa pemakai sereta enda ngelaungka tuak Gawai lalu dirami ngena macham main enggau pemerindang.

“Kami sebuat dibai belagu karaoke merindang ati, betanda naka pengerami, chapuh begulai enggau ati lantang.

“Lalu ai ansah ti disagu menyadi kitai Insol, dikena meransang, ngelancham ati enggau runding sereta muji kami ti diangkat bejaku, ngasuh aku ngasaika penatai kami sebuat chukup dipebasa,” ku Norina madahka diri temegah ati enggau basa tuai rumah.

Ai Ansah
Ngelansa pasal ai ansah ku Insol, dikena iya masa penatai bala pengabang ti mega nyadi temuai dipebasa datai ngabang ke rumah iya.

Ku Insol, ai ansah tu tapis silup jaku dikena meransang tauka ngansah pangan diri lebuh maya pengerami baka maya melah pinang, maya gawai enggau pengerami bukai.

“Tau mega dikumbai kitai jaku peransang enggau basa dikena ngangkatka orang ti dituju nya ari penuduk iya.

“Kebuah kitai ngansah orang nya ngambika iya enda malu mansutka penemu diri lalu penemu ti dipansutka iya nya lagi bias landa, ngasi sidi, ngayuka pemujur pengawa ti dikereja maya nya.

“Ai ansah tu mega mayuh macham sereta enda tau diberi ngagai orang sebarang, nama ukai orang bempu pengawa ti dikeluluka kitai dia.

“Enti salah beri, iya tau negamalu sereta ngelanyaika orang, tit au ngujungka penyarut nyadi enti pala sama udah ngelu.

“Ambika banding, ai ansah ungkup Tuai Rumah enda tau diberi ngagai Bujang Berani, pia mega orang bisi gelar ke bukai,” ku Insol lebuh dirandau Suara Sarawak berebak enggau pengerami diatur ba rumah iya ditu.

Sama ngabang Chairman Dap Sri Aman Leon Jimat Donald, Chairman PKR Sri Aman Yen Jebeni, Ketuai AMK Sri Aman Lawrence Temba, Chairman Gidsa Bonie Langkop, bala kaban Dayak Bukit Kelingkang (DBK), bala kaban Serakup Dayak Sarawak (Pedas) Sri Aman sereta bala bukai.