Bai anak nyereta Sarawak Kid God Talent 2019

KUCHING: Penyampau RM10,300 perais nganti nembiak mit ba Sarawak Kids Got Talent (SKGT) 2019.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madah SKGT deka diatur kena 17 Oktober lalu disadang dipenyadi Kepala Menteri Datuk Patinggi Abang Johari Tun Openg.

“Tuju ngatur SKGT tu iya nya endur bala nembiak mantaika penau ti dikembuan sida kenyau ari mit.

“Pia mega, kitai ngasuh bala nembiak ngempu ulah beserakup ba umur biak laban Sarawak ngempu mayuh raban pupu bansa,” ku iya.

Fatimah mansut pekara nya ba aum pemberita ba Begunan Baitul Makmur ditu, kemari.

Sentang pekit nya, iya madah bisi lima kategori deka diperebutka iya nya pengelandik bejaku, betanda, belagu, nyura enggau pengelandik bukai tauka special talent.

“Kelimpah mata duit sida mega deka diberi trofi enggau setipikit penyereta.

“Bagi pengelandik bejaku nembiak meseti beumur empat ngagai enam taun, lalu champion deka mai pulai RM700 ba tiap bengkah jaku iya nya Melayu, English, Iban enggau Mandrin.

“Ba pekit betanda digaga beraban bisi kategori A nembiak ti beumur empat taun kebaruh enggau kategori B nembiak ti beumur lima ngagai enam taun deka mai perais RM2,000.

“Pekit nyura nembiak ti beumur empat ngagai enam taun, belagu kategori A nembiak beumur empat taun kebaruh enggau kategori B nembiak beumur lima ngagai enam taun sereta pengelandik bukai tauka penau ke nyelai lalu semua champion deka bulih perais RM700 magang,” ku iya.

Fatimah nambah, ba pekit tu bisi anugerah khas akim penyampau RM700 mega deka diberi ngagai nembiak ti nemu narit ati akim maya nya ila.

Iya ngarapka apai indai ti bisi anak landik ba lima bengkah kategori tau mai anak sida nyereta pekit tu.