KUCHING: Randau Pemansang Tumu Anak Mit 2019 berambaika jaku ‘Early Childhood Educatuon: Inclusivity the Way Foward’ deka ngemeratka pelajar penuh ungkup anak mit.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madah randau tu deka diatur kena 13 nyentuk 15 September tu ila ba sebuah hotel tebilang ditu.

“Kitai nagit 500 iku pengajar enggau penyaga anak mit di Sarawak ngulu randau tu.

“Randau tu ila deka bekunsika penau, penemu enggau pemandai pasal pelajar tumu nembiak mit awakka sida ulih nyaga sereta ngajar nembiak mit enggau bekualiti,” ku iya.

Fatimah mansut pekara nya ba aum pemberita ba Begunan Baitul Makmur ditu, kemari.

AUM PEMBERITA…Datuk Sri Fatimah Abdullah (dua kanan), Datuk Rosey Yunus (tiga kanan) maya aum pemberita ba Begunan Baitul Makmur tadi.

Nangkan nya, iya madah laban opis menteri udah ngemendarka Geran Khas Ninting Taun (GTK) RM5,000 ngagai institusyen anak mit sebedau tu, nyadi iya ngarapka mayuh agi bala pengajar enggau pengasuh deka datai ngulu randau tu ila.

“Semua 3,031 institusyen pelajar nembiak mit Taska enggau Tadika bulih geran tu tang semina 2,745 palan aja udah nganjung pom minta GTK.

“Kitai meri geran tu dikena nyendiaka pemakai ti manah ngagai nembiak mit, perengka belajar ti ngerindu, ngaul apai indai dalam hal anak mit sida nyengkaum ngemansangka penau enggau penemu bala pengajar.

“Nya alai, aku amat ngarapka sida intitusyen pelajar anak mit tu ulih ngena geran nya nganjung pengajar enggau pengasuh sida ngulu randau tu ila,” ku iya.

Kelimpah ngemeratka pelajar inklusif nembiak mit, randau nya mega ngemeratka chara ti lebih efektif dalam nangkup peminta nembiak mit enggau ngembing nembiak mit belajar lalu meri empas ti positif ngagai penumbuh mental sereta fizikal sida.

Ba pekara bukai Fatimah madah, nyentuk 20 June tu tadi bisi 9,767 (73.79 peratus) nembiak baru ada udah direjister ba Endowment Fund Sarawak (EFS).

“Kitai nagit 100 peratus nembiak deka direjister ba EFS tu dalam timpuh enam bulan ti deka datai, nya alai kerejasama ari 52 buah Opis Pengerejister dikena nyidi pelilih menua ni ti mimit lalu bedau ngerejister.

“Nembiak mit ti baru ada patut bisi EFS tu laban penyampau duit ti dikeulih sida nya majak nambah nyentukka sida nyapai umur 18 taun ila,” ku iya.