KUCHING: Sekula Sekondari (SMK) Petra Jaya mujur nempa rikod baru lalu dipasuk dalam Bup Malaysia ba kategori Program Eksibisyen enggau Pekit Ngaga Chura Setem (Rebest) enggau penyampau 691 iti setem.

Direktor Opis Pelajar Sarawak Dr. Azhar Ahmad madah SMK Petra Jaya keterubah iya ngulu pekit laban semina deka nguji tang sida mujur nempa rikod baru.

“Kelab Setem enggau Filatepi (Kesef) nyadi siti kelab ti pemadu beguna ba pengawa kokurikulum ba sekula.

“Siti ari tuju Kesef tu iya nya ngambika ulih nerenak sereta mansutka nembiak ti chakah, landik sereta meretika sejarah,” ku iya.

Teks jaku iya dibacha pengari iya, Sapit Direktor Opis Pelajar Sarawak Abang Mat Abang Masagus ba pengerami bejadika program Nutup Eksibisyen enggau Pekit Rebest sereta Bup Malaysia (2019) di SMK Petra Jaya ditu, kemari.

DIPASUK DALAM BUP RIKOD MALAYSIA.. Pemesai Bup Rikod Malaysia Nurul Fatihah Mahmod (kiba) nyuaka setipikit pemujur nempa rikod ngagai Prinsipal SMK Petra Jaya Khasim Brahim (kanan).- Gambar Ramidi Subari

Nangkan nya, iya ngarapka bala nembiak chakah agi ngaul diri dalam pengawa kokurikulum lalu bala pengajar patut nyadi orang ti nerenakka ulah nembiak.

“Chakah dalam pengawa kokurikulum siti pekara ti positif lalu nembiak ukai semina patut meri fokus ba pengawa pelajar aja.

“Penyulut ba akademik endang siti pekara ti patut tang nembiak patut belajar ngaul diri enggau mensia mayuh lalu belajarka pekara luar ari bilik kelas enggau pengawa komuniti baka ti dipejalaika mayuh bengkah ejensi,” ku iya.

Iya mega meri tabi basa ngagai semua nembiak enggau pengajar ti udah sama masuk dalam pekit ngaga churak setem nya.

Kelimpah ari nya, Prinsipal SMK Petra Jaya Khasim Brahim madah objektif Rebest iya nya dikena nerenakka ulah nembiak bebasa sereta rinduka Malaysia.

“Tu mega siti ari jalai bala nembiak ulih nerenak ulah beserakup, bisi identiti diri empu, chakah sereta inovatif dalam betemu enggau pemar dunya.

“Piak sekula udah bebendar ngaga rekod dalam Bup Rikod Malaysia nengah Eksibisyen Rebest lalu netapka tagit penyampau 1,000 setem tauka lebih,” ku iya ba jaku iya demalam.

Ku Khasim, sepenyampau 60 bengkah sekula sekondari enggau 55 sekula primari selampur Malaysia masuk pekit tu ti berambaika jaku Malaysia Indah (Wonderful Malaysia).

Seraya, Pengajar Pengemata Kesef, Hajijah Awi madah penyampur sekula sekondari enggau primari ari selampur Sarawak ti enggau pekit tu iya nya 40 bengkah sekula.

Sama ngulu pengerami nya Pemesai Pelajar Pelilih Kuching Kamariah Said, Pemesai Bup Rikod Malaysia Nurul Fatihah Mahmod, Presiden Gerempung Filateli Malaysia Datuk Anuar Bashah sereta pengari ke bukai.

EKSIBISYEN SETEM… Abang Mat enggau Kamariah meratika setem ti digaga bala nembiak SMK Petra Jaya.-Gambar Ramidi Subari