SARATOK: Genap hari besai ngaul jalai pengarap baka Hari Raya Adilfitri, Gawai Dayak, Krismas, Taun Baru China enggau Deepavali patut diintu enggau ati beniatka utai ti manah baka minta diri mujur ba semua pengawa.

Ku Kaban Parlimen Saratok Ali Biju, ba menua kitai diuan pupu bansa, ngintu hari besai baka tu ukai semina tau ngempitka pemanah kaul entara sida ti ngintu pengerami nya aja tang mega raban bansa bukai ti bisi datai ngabang.

“Enti dibanding enggau menua bukai, Sarawak tu nyelai sereta bisi bida senentang adat, main asal enggau jalai pengarap ke alai rayat menua tu balat agi begempung enggau pangan diri.

“Semua kitai dipeda bela gagit nganti penatai hari besai ukai semina raban bansa ti ngintu nya aja tang mega bala bukai laban pengerami tu diambi nyadika awak dikena sida ngerapitka pemanah sintal kaul enggau pangan diri,” ku Ali madah nyemetak.

Iya mansutka jaku tu lebuh bejaku ba mua mayuh rambau nyerumba pejalai ngabang Hari Raya Aidilfitri ngagai Sekula Primari (SK) Haji Junid di Gerigat Kabong ditu tadi.

TANGGUNGPENGAWA… Ali dibai ngabas taba ti deka endur nirika balai mayuh guna SK Haji Junid ditu, tadi.

Ku Ali, pemanah kaul ti ditanggam rat baka tu semina ulih diasai enti menua kitai likun enggau bisi pemaik.

“Pengelikun enggau pemaik menua bepun ari pengawa ti udah dipejalaika perintah laban kitai endang semampai ngansak rayat pupu bansa besambi penemu enggau pangan diri. Pekara baka tu semina ulih dijapai enti datai ari ati lurus rayat empu,” tandu Ali ti mega Kaban Kunsil Nengeri (Adun) Krian.

Nya kebuah ku Ali, kitai enda patut telengga-lengga, tang patut ngingatka lima jaku lalau Rukun Negara ti udah mujur ngempung rayat pupu bansa lalu penemu tu jarang bendar ulih ditunda menua bukai di serata dunya.

“Nya alai kitai enda tau enda beratka peneguh kaul ti diasaika diatu lalu enda ngumbai pengelikun ti diasaika datai pia aja.

“Anang kitai ngumbai pengelantang rayat diau ba menua ti merintah diri nya utai ti diulih enggau jalai muntang tang kitai patut nyaga pengelantang enggau nyaga pengelikun menua laban tu endang udah tanggungpengawa kitai begulai.

SADA RAYAT… Ali mendingka peminta enggau sebana ari piak sekula enggau pengari PIBG.

“Dua pekara tu ngemai reti besai endar laban enti kitai beratika pemerinsa orang ba menua ti bisi penyarut, baka diayan sebelah media rama ninting hari, kitai patut mereti sereta naka ulih ngetanka menua tu ari dikuasa orang ari menua bukai.

“Enti kitai meretika pekara tu kitai tentu naka ulih ngereja pengawa dikena nyaga pemaik, pengelikun, pemanah kaul enggau pengelantang ba menua tu.

“Sapa agi ti dikarapka nyaga menua enti enda kitai empu,” ku Ali nyimpul jaku lebuh dirandau Suara Sarawak.

Berebak enggau nya, Ali bisi dibai bejalai ngabas taba deka endur nirika balai mayuh guna sekula nya lalu balai tu deka digaga ngena chara beripai.

Ali mega udah ngagihka belanja penyampau RM10,000 ungkup Serakup Apai Indai enggau Pengajar (PIBG) SK Haji Junid dikena sida ngatur program enggau aktiviti pulaika pemaik komuniti kelebih agi pemansang pelajar ba sekula nya.

NIBAR JAKU PERANSANG… Ali Biju