KUCHING: Bemacham servis deka disediaka 30 bansal nyerumba Program Ngempung Rayat Renggat Nengeri Sarawak Hari Enam tu.

Program tu deka diatur berengkah ari pukul 9 pagi nyentuk 6.30 lemai di Mydin, Petrajaya ditu.

Sapit Menteri Besai ti mega Menteri Pemansang Orang Indu, Ruang Bilik enggau Raban Bansa, Dato Seri Dr Wan Azizah disadang datai bejadika program urung pukul 3.00 lemai nya.

Entara servis bisi disedia baka rejista bantu pengelantang, sanding penemu ruang bilik, ngaga cheremin mata nadai bebayar enggau mayuh ke bukai.

Pengawa besambika penemu ari bemacham ejensi perintah, terapi seni sereta meresa bayar saman enggau kompaun Dewan Bandar Raya Kuching Utara (DBKU) mega bisi disedia.

Kelimpah ari nya, bisi mega pengawa pemerindang ari orang lunggar umur enggau Orang Nyelai Pendiau (OKU) sereta bisi peluang beperindang ba Mini Studio RTM ungkup bala pengusung ti datai ngulu program nya.

Pengawa mandangka main asal mega bisi diatu baka bemukun enggau mayuh ke bukai ti ngayanka penyelai daya idup rayat di Sarawak.

Nya alai, anang masau peluang ngulu Program Ngempung Rayat ti diatur Hari Enam tu.

JAKU TESAU… Poster Program Ngempung Rayat Renggat Nengeri Sarawak di Mydin, Hari Enam.