LAWAS: Kampung Long Tengoa ngembuan peluang ti besai ngambi dikemansang enggau pengawa betanam betupi.

Kebuah pia, Kampung Long Tengoa ngembuan palan strategik enggau tanah ti ami.

Menteri Muda Betanam Betupi, Abdul Rahman Ismail madah sektor nupi ikan semah entara pengawa betanam betupi ti ngembuan peluang dikemansang ba menua nya.

Ku Rahman, nyema perambu nya mujur dipejalai, pekara tu deka meri pangka besai ukai semina dalam pengawa betanam betupi aja tang mega dalam pekara dagang temuai.

“Naka tu, semilan sitak udah ditemu ngembuan peluang ti sama baka di Lawas lalu pengawa tu mujur dipejalai ba Long Lidung.

PALAN NUPI SEMAH…Abdul Rahman ngabas endur nupi ikan semah di Kampung Long Tengoa.

“Nya alai, sistem Tagang Semah dikerembai ungkup pengawa ngintu sungai ngambika mayuh agi ikan kelimpah ngajar mensia mayuh nyaga sungai ke nyadi endur asal ikan nya,” ku iya.

Iya mansutka jaku nya lebuh nemuai seraya gawa di Kampung Tengoa Lawas, ditu kemari.

Kenu ku Abdul Rahman, iya deka seruran ngemansangka pengawa betanam betupi nengah pengawa ngatur mayuh agi program ngabas seraya gawa ke baka tu.

Seriris enggau juluk Kepala Menteri Sarawak, Abang Jo lebuh ngaga transformasyen ba pengawa betanam betupi bepun taun 2030 Sarawak nyadi nengeri penyual besai dalam pengawa betanam betupi.

Ku iya, Sarawak agi meli barang ari menua bukai iya nya penyampau RM3.6 bilion kelebih agi pemakai jelu tupi.
Iya ngelalau komuniti ba menua utara patut seruran ngambi bagi dalam pengawa nupi kerebau.

“Perintah Nengeri diatu bejalaika sistem Pawah ungkup orang ke nupi jelu deka diberi beberapa iku kerebau enggau mulaika baru nyema kerebau nya udah beranak laban deka diberi ngagai orang betupi bukai,” ku iya.

Sama bisi datai, Kaban Parlimen Lawas, Datuk Henry Sum Agong, Pemesai Pelilih Lawas, Ladin Atok, Ketuai Pemantu Direktor Pengawa Berikan Darat, Awang Alim, Pemantu Pemesai Betanam Betupi Lawas, Doraoup Mail enggau Pemantu Pemesai Veterina Lawas, Rosline Asut.