KAPIT: Projek ngaga Jalai Menuan ke endang udah diperambu deka berengkah enda lama agi, ku Kaban Kunsil Nengeri (Adun) Bukit GoramJefferson Jamit Unyat.

Iya madahka jalai tu siti ari insentif perintah nengeri (GPS) ngagai rayat lalu udah disukat raban Opis Tanah enggau Survei ambika nemu berapa pemesai enggau pemanjai jalai tu ulih digaga sereta ngira ungkus ke patut dikena ngemansang ke jalai nya.

“Kenyau ari taun 2016 aku nyadi pengari rayat lau berarap ulih ngaduka pengawa ke manah ba sitak Bukit Goram baik ke nya ari segi pemansang tauka pengawa bukai.”

Iya madah deka lebih chakah agi mantu pemansang rumah panjai ba sitak tu sereta bela besaup enggau Kaban Parlimen Kapit, Datuk Alexander Nanta Linggi.

“Nyadi aku ngarapka kitai ulih terus nyukung chalun ari Parti GPS ba Pengawa Bepilih Nengeri 2021 ke deka datai nengah iring Kepala Menteri Sarawak, Datuk Patinggi Abang Johari Tun Openg ngambika mayuh agi pemansang ulih dikenatai ba sitak tu dudi hari,” ku iya.

Iya madah munyi nya rambau bejadika pengerami Ngiling Bidai Gawai Dayak 2019 ke diatur ba Rumah Kenyalang, Nanga Sekeranji di Menuan ditu.

Pengerami tu diatur nengah kerejasama Gerempung Apai Indai Nembiak enggau Pengajar (PIBG) SK Lepong Menuan enggau JKKK Rumah Kenyalang.

Lebuh bejaku ba pengerami tu dia Jamit madahka diri chukup gaga ati meda penyerakup entara tuai rumah ke genturung enggau Sungai Menua, Sungai Belawai sereta Batang Rajang bisi datai nyukung pengawa tu.

“Pengerami Gawai Dayak enggau Ngiling Bidai tu siti ari pengerami ke ulih nanggam pemanah kaul enggau pangan diri enda ngira nya sida ke ari jauh tauka semak sama bela datai ngulu pengerami hari besai kitai,”ku iya

Kelimpah ari nya, ulah ti bebasa ke pangan diri enda ngira bansa enggau pengarap entara bansa bukai mega ngulihka pengari rakyat ulih lebih fokus agi ngatur pemansang ba sitak nya ku iya.

Sama bisi datai Kaban Parlimen Kapit, Datuk Alexander Nanta Linggi, Sekretari Politik ngagai Kepala Menteri Sarawak, Tapah Ata, Penghulu Pasang Tuba , Pengulu Sia Shui Poh, Kepala Pengajar SK Menuan, Cikgu Rambo Usoh enggau ke bukai.

ADAT…(Duduk ari kiba), ex-Tuai Rumah Radin (ketuai pegatur program), Jamit, Cikgu Rambo, Nanta, Pengulu Pasang, Tapah Ata ngepunka pengawa enggau adat miring.