SRI AMAN: Semina jaku puji enggau terima kasih ulih dikena ngayankan pengelantang ati diberi peluang belajar taja umur udah lunggar, ku siku ari sepuluh ‘nembiak’ Kelas Orang Tuai dipejalai Tim Projek Pensel.

Ku iya, nadai kala bemimpika diri bulih peluang baka tu laban berundingka tikas umur lalu nadai kelas ungkup orang tuai kala diatur sebedau tu.

“Rebak umur kami ngelama tu nadai runding deka belajar, ngulu kelas ti bisi pengajar ngembing. Enti baka kus tauka seminar betanam betupi enggau kulinari nya suah ninga orang nyebut.

“Asaika bemimpi lebuh Tim Projek Pensel datai kitu, meri langgur penemu lalu ngatur kelas orang tuai pengudah ngempung penemu sereta dipesetuju enggau disukung kami ditu.

“Nya kebuah inisiatif tim Projek Pensel tu patut dipuji sereta ditunda raban gempung ukai dikuasa perintah (NGO), opis enggau ejensi perintah enggau peribit, pulaika pemaik serap komuniti, nadai ngira renggat umur laban semua orang bisi hak ti sebela.

KOMITI PENGAJAR… Kepala Pengajar, Korea Musit (kanan), entara sida ti ngemujurka pejalai Kelas Orang Tuai Projek Pensel.

“Munyi ku jaku sempama, untung bulih beliung enda ngambuh, mudah bulih peredah enda ningkuh. Diatu bepanggai ba diri empu deka tauka enggai aja. Enda lebu belajar taja umur udah tuai,” ku iya madah nyemetak lebuh dirandau Suara Sarawak.

Nitih ku Pemungkal Projek Pensel, Norina Umoi Utot, kelas tu diatur dua kali seminggu di Kampung Melikin, Sungai Gudum, Balai Ringin ti meransang sida ke tuai belajar macha, nulis enggau ngira.

Tim Projek Pensel endang keran ngemai komuniti kelebih agi sida ke diau di menua pesisir sedarka pemesai guna pelajar nadai milih umur.

“Aku dekaka komuniti kitai bela ampit belajar ari peluang ti disediaka kitai ungkup sida, abis nadai sida nemu nyepil enggau nulis nama diri lebuh ngaduka pengawa sebelah opis, bank enggau ke bukai.

“Nya kebuah kitai ngepunka singkar berengkah ari umur biak, renggat pra sekula dataika kelas ungkup orang tuai laban tuju kitai, pelajar ungkup semua,” tandu Norina.

Ku iya, genap pejalai tim sida nadai kala datai enggau jari puang, abis nadai kami ngemai set pensel nyadika tepa dikena meransang bala nembiak angkunka pelajar, pia mega sida ke tuai, bela diketati.

“Kitai nemu, sida ke diau di menua pesisir kelebih agi di rumah panjai nadai entu meruan penatai pemisi.

“Tebal agi sida ke lelaki belelang kereja ke mengeri, sida ke indu enti enda bumai enggau bekebun, nitihka laki gawa di mengeri, lalu bala anak tinggal di menua, diibun aki ini.

“Taja pemeri kitai tu enda besai rega, tang ulih meri pengelantang ati ngagai bala nembiak, ngasuh sida ransing agi belajar seraya sida ke tuai ampit ngasaika diri besekula,” ku Norina andalka pengawa sida sebuat mujur meri peransang ngagai orang bukai.

Kelas Orang Tuai 2019 tu diembing kepala pengajar Korea Musit lalu disaup bala pengajar baka Micheal Entinggie Ayok, Silvia Rantai enggau Michsion Rantai.

NYINUK… Bala ‘nembiak’ Kelas Orang Tuai di Kampung Melikin, Sungai Gudum di Balai Ringin benung macha utai diajar pengajar ba papan turai.