Enam bulan merinsa ba Pulau Solomon

KUCHING: Sinu beratika pengeransing bansa kitai nguji ngiga pengidup ba menua orang, tang enda ngadang diri nyau kena tipu orang.

“Aku enda sabar deka betemu enggau kami sebilik pengudah napi pemerinsa ba Solomon nadai gaji enggau makai,” ku Ugot Masam, 31.

Ugot entara enam rayat Sarawak ke mujur dibai pulai ke menua pengudah tepejuh ke Pulau Solomon kenyau Mei lalu dipelaba kena tipu pengaji sida.

Ku iya, pengelama enam bulan udah ba pulau nya, iya enda kala nerima gaji asil pengelelak gawa ba kem batang di menua nya.

“Aku disemayaa diberi gaji RM7,000 tang lebuh datai dia, aku enda kala nerima gaji nyampau nya, tang nyau diansak gawa siang enggau malam.

“Raban kami bisi tujuh iku lalu semina siku aja diberi berau 10 kilogram, garam, gula enggau pemakai dalam tin ungkup bekal sebulan.

“Nya alai, kami nyau begigaka sayur babas baka tubu, daun jabang enggau sebarang daun ke tau diempa nyadika lauk,” ku iya maya dirandau ba Padang Bilun Entarabansa Kuching (LTAK) kemari.

Kelimpah ari Ugot, lima iku bakih ke bukai iya nya Edau Mengit, 45; Melingang Laja, 43, enggau Ricky Alex, 26, asal ari Kapit sereta Denis Anyie Ngau, 46, sereta Anyie Ngau, 43, ari Baram, Miri dibai pulai nengah i Singapore.

Kenu ku Ugot ke asal ari Kapit, sekumbang diau ba pulau nya, iya bisi tiga kali masuk sepital laban kena sakit nyamuk (malaria).

AUM PEMBERITA…(ari kiba) Endau Mengit, Ugot Masam, Ricky Alex enggau Melinggang Laja dirandau pemberita pengudah sangkai ba Padang Bilun Entarabansa Kuching, kemari.

“Maya nya, aku semina ingatka mua bini enggau tiga iku anak ke beumur setaun nyentuk enam taun ba menua.

“Udah ga pengelama enam bulan din, aku enda ngirum belanja laban nadai dibayar gaji.

“Tu mih keterubah aku gawa ba menua nya pengudah dipadahka siku bakih ke teleba pengaji nya,” ku iya.

Ku iya, tiga bakih bukai iya nya Edau, Melingang enggau Ricky kala gawa ba menua nya sebedau tu iya nya taun nyin kemari tang nasib sida manah tekenaka pengaji ke manah.

“Tang, nasib sida enda manah serak tu laban baru sebulan datai ba salomon, sida nadai dibayar gaji tang nyau nanggung utang urung RM4,000 munyi ke udah dipadah pengaji.

“Aku empu udah diasuh mayar utang urung RM18,000. Aku enda nemu utang nya kebendar utang nama diumba kami nadai dibayar gaji,” ku iya seraya madah diri deka dibunuh nyema ditemu nguji ngelarika diri ari kem batang nya.

Ba surat kabar ensana, Kaban Kunsil Nengeri (Adun) Telang Usan, Dennis Ngau madah pengawa nyelamat sida tu asil ari bantu Sapit Kepala Menteri ke mega Adun Baleh, Tan Sri James Jemut Masing bekerejasama enggau Wisma Putra.

“Semua sida ke tepejuh ba Pulau Solomon bisi penanggul enggau pengaji sida ba kem batang di menua nya.

“Sida udah nya ngelawa Opis Duta Malaysia di Pulau Solomon kena 13 Mei lalu madahka sebana diri,” ku iya.

Pengudah nemu penanggul ditapi sida, Dennis naka ulih ngumpul belanja dikena meli tiket bilun ke beungkus RM3,800 siku.

Pengawa mai pulai rayat Sarawak bela dibantu Menteri Luar, Datuk Saifuddin Abdullah; Ketuai Sekretari Opis Menteri Luar, Datuk Seri Muhamad Shahrul Ikram Yaacob enggau Ketuai Tinggi Malaysia di Port Moresby, Mohamad Nasri Abdul Rahman.

Bela manti iya nya Duta Malaysia Pulau Solomon, Hii Yii Ging; Sekretari Ketiga Komiti Tinggi Malaysia di Papua New Guinea, Mohd Rezza Mohd Yusof enggau Kaban Parlimen Hulu Rajang, Datuk Wilson Ugak Kumbong.
Penatai sida ba LTAK kemari disambut Sekretari Media Tan Sri James Jemut Masing iya nya Henry Yan Masing.