Anang semina ngandalka pengajar ba sekula

KUCHING: Pemujur siku nembiak dalam akademik tauka kokurikulum ukai semina bepanggai ngagai pengajar enggau sekula aja.

Kaban Kaunsil Nengeri (Adun) Demak Laut Dr Hazland Abang Hipni madah pemujur ti dijapai nembiak ukai semina bepanggai ngagai pengajar enggau sekula, tang ari apai indai, komuniti enggau ketuai kampung sereta piak perintah.

“Apai indai ngembuan juluk deka meda anak sida mujur dalam pelajar enggau pengidup jemah,” ku Hazland.

“Dikena nyapai juluk nya, nembiak enda tau kelalu bepanggai ngagai piak sekula enggau pengajar aja laban sida diajar nitihka pelajar sida kelimpah meri chunto pengawa ke manah dalam pengidup nembiak,” ku nerang.

Hazland madah, pekara bukai baka tanggungpengawa apai indai, komuniti kampung enggau ketuai kampung sereta perintah ti nempa nembiak ngambi nyadi lebih manah sereta mujur.

SERURAN NYUKUNG… Dr Hazland Abang Hipni (tengah) ngabas palan eksibisyen program ‘Language in Motion’ diatur PIBG SMK Seri Setia Tabuan, Sekula Primari (SK) Tabuan enggau SK Tabuan Hilir, apin lama ke udah.

Iya mansutka jaku nya beserimbai enggau program ‘Language in Motion’ diatur Gerempung Apai Indai enggau Pengajar (PIBG) Sekula Sekondari (SMK) Seri Setia Tabuan, Sekula Primari (SK) Tabuan enggau SK Tabuan Hilir, apin lama ke udah.

Iya mega nyukung pengawa ngatur program akademik tu nyadika sebengkah chara nembiak rindu mantaika pengelandik sida ba luar kelas.

“Pengawa ti dipeda kitai tu asil kreativiti nembiak enggau bala pengajar dalam jaku, penemu enggau pengelandik,” ku iya.

Iya nambah. Kitai deka semua nembiak enggau pengajar ulih ngerembaika idea sida ngambi ulih ngasilka teknologi ke baru ngagai pengidup besehari-sehari.

“Aku pechaya nembiak kitai ngembuan penau enggau kreatif ngasilka inovasyen baru ti ulih dijual,”ku iya.

“Kitai patut seruran pechaya ngagai sida ngambika kreativiti nembiak ulih ditambah enggau dikerembai,” ku Hazland nambha.

Kelimpah ari nya, Dr Hazland mega ngemeratka aspek nguasa Jaku Inggeris ngagai bala nembiak kelebih agi ba sekula primari (SK).

“Bepun 1 Januari 2020, bala nembiak primary Satu ba Sekula Primari (SK) deka diajar Sains enggau Matematik ngena Jaku Inggeris nyadi sebagi ari tansgormasyen pelajar di baruh Perintah Sarawak,” ku iya.

“Nguasa Jaku Inggeris diatu beguna amat lebuh teknologi ti diasil mayuh ngena jaku entarabansa kelimpah kitai deka sistem pengawa belajar ulih nyapai standard entarabansa,” ku iya.

“,Nya alai, apai indai enggau pengajar patut besedia ngambika sistem ti deka dikena tu ulih dibantai ngagai nembiak ngambi nyapai juluk nya,” ku Dr Hazland.

Ba pengawa nya, nembiak ari SMK Seri Setia Tabuan, SK Tabuan, SK Tabuan Jaya enggau SK Tabuan Hilir udah ngaga pemerindang dikena mantaika penau enggau kreativiti sida.

Sama bisi datai, Prinsipal SMK Seri Setia Nur Muhd Aiman Abdullah, Pengari Opis Pelajar Nengeri (JPN) Sarawak, Penghulu Kampung Tabuan Jas Said enggau ke bukai.