Polisi liberasasyen tu udah ngurangka ungkus mansutka gula ti nyata enggau ngelimatka urung RM1,000 tiap tan gula.

KUCHING: Semua industri pemakai enggau ai irup (F&B) di Sarawak gaga ba pengawa meri lisin meli gula (AP), pia ku Menteri Dagang Dalam Menua enggau Pekara Bebelika Barang Chong Chieng Jen.

Kenu ku Chieng Jen, kebuah pia polisi liberasasyen tu udah ngurangka ungkus mansutka gula ti nyata enggau ngelimatka urung RM1,000 tiap tan gula.

“Sebuah pemansut F&B udah minta tumu kena taun nyin kemari lalu nerima AP pengujung taun nyin kemari mega.

“Lapan buah kilang F&B ke bukai minta enggau nerima AP sida bulan Jun taun tu,” ku iya dalam siti penerang, kemari.

Nya alai, Chong mantah jaku ketuai Parti Sa’ati Rayat Sarawak (SUPP) pasal pemansut AP nya siti bentuk kronisme kelimpah meri pemaik ngagai diri empu.

Chong madah, pengawa meri AP ngagai lapan pemansut F&B di Sarawak tu polisi liberalisasyen Perintah Pakatan Harapan (PH) dikena ngelaban polisi monopoli Barisan Nasional (BN) sebedau tu.

Ku Chong, pemansut F&B ke bukai di Sarawak tau minta AP enti amat begunaka gula dalam pemansut sida.

Taja pia, ku iya gula ti dibeli meseti ungkup dikena diri empu dalam pemansut sida lalu enda tau dijual baru.

“Semua kilang F&B tau minta ngagai opis menteri.

“Nadai ditagang tauka haribulan kepenudi mantaika peminta sida lalu gula ti diimport meseti dikena sida empu,” ku Chong.

Chong nambah, AP tu dipansut chara terus ngagai pemansut lalu enda ngena transaksyen ari orang tengah.

Kelimpah ari nya, iya madah peminta ti mujur mega nadai dipinta mayar rega gula tu.

Berindik ari pemujur polisi bekal gula tu di Sarawak, Chong madah opis menteri iya merambu deka bejalaika polisi tu ba Sabah.