KUCHING: Ketuai Parti Keadilan Rakyat (PKR) Sarawak ngansak Kepala Menteri Datuk Patinggi Abang Johari Tun Openg patut lurus lebuh mantaika asil chukai jual lima peratus ungkup produk minyak enggau gis ti digumpul perintah nengeri ari serikat ti bekaul.

Kaban Parlimen Puncak Borneo Willie Mongin madah, Abang Johari mega patut madahka berapa mayuh serikat ti direjista mayar chukai jual nya.

“Berapa mayuh chukai jual ti udah digumpul naka 31 Mei 2019 enggau penyampau nyema bisi enda dibayar.

“Padahka nama serikat ti agi berunding enggau perintah nengeri dikena mayar chukai jual ti dtetapka nya,” ku Willie dalam siti penerang, kemari.

Kena 25 Jun, Abang Johari dipadah nyauka semua serikat minyak enggau gis ti beoperasyen di Sarawak udah mayar chukai jual lalu semina siti serikat aja ti agi berunding bekaul pekara nya,

WILLIE MONGIN

Willie madah nyemetak, serikat ti enda mayar chukai jual tu tau kena atur undang-undang.

Nambahka nya, Willie ngaku jaku Menteri Wang Lim Guan Eng pasal Sarawak deka bankrap dalam timpuh tiga taun tu digaga nitihka peragam ati tang enda berundingka pemansut penatai pemisi Sarawak.

Pekara tu nitihka bajet nengeri penyampau RM11 bilion ungkup taun tu lalu rizab perintah nengeri bisi RM31 bilion.

Taja pia, Willie madah tiga projek besai ti dibayar perintah Sarawak empu enda dikira dalam bajet 2019 tu.
Entara tiga projek besai iya nya projek Aliran Transit Ringan (LRT) ti dipelaba beungkus RM10.8 bilion, tiga buah jematan iya nya Batang Lupar, Batang Rambungan enggau Sungai Igan beungkus RM1.42 bilion enggau bas hidrogen beungkus RM205 juta.