Nengah perengka guna tu, raban kampar enda ibuh ngiga teda pemakai enggau tinduk sengapa sebelah kaki lima, baruh jematan tauka pasar.

MIRI: Perintah negeri nengah Opis Menteri Pengintu Pendiau, Pengelantang Komuniti, Orang Indu, Ruang bilik enggau Pemansang Anak Mit deka terus chakah mutarka penanggul kampar ba selampur Sarawak.

Menteri iya, Datuk Sri Fatimah Abdullah madah dikena mutar isu nya, opis menteri iya besaup penemu enggau berunding ngiga atur ke ngasi dikena nyeliah penanggul ke majak balat.

Iya madah munyi nya rambau bejadika Pengawa Nyuaka Perais Pelanda Ngumpul Belanja 2019 di Dynasty Hotel ditu kemari.

“Ba Sarawak, semina Kuching aja bisi Anjung Singgah, nyadi diatu kami benung ngelanggur ngaga dua buah agi Anjung Singgah ba Miri enggau Sibu.

KENA MANAH…Datuk Sri Fatimah Abdullah (tengah) ngemataka Tony Pui (kiba) nyuaka pemeri ngagai pengari sebuah ejensi ke dipilih dalam Pelanda Ngumpul Belanja 2019 ditu, kemari.

“Naka tu, taja nya agi dalam perambu, tang kitai udah ngelala dini endur ke engkeman ungkup projek pengelantang komuniti ti diperambu,” kui ya.

Tang, tandu Fatimah, konsep Anjung Singgah di Miri enggau Sibu nyangka bebida ari di Kuching, laban perintah deka meri awak ngagai mensia mayuh mantu orang ke nadai palan diau enggau meri sida pemakai.

“Palan ngenduh nya deka diserangkung bepelasarka konsep
‘Kitchen Soup’, nyadi ejensi enggau gerempung ukai perintah (NGO) ulih ngambi bagi meri bantu pemakai ngagai sida.

Nengah perengka guna tu, raban kampar enda ibuh ngiga teda pemakai enggau tinduk sengapa sebelah kaki lima, baruh jematan tauka pasar,” ku iya ke mega Adun Dalat.

Tambah mega, tu sebagi ari pengawa perintah dikena ngurangka penyampau kampar di Sarawak lebih agi ba kandang mengeri.

Ba pengerami nya, Fatimah mega madah deka meri geran perintah nengah Projek Mit Menua Pesisir (MRP) penyampau RM15,000 ungkup program Pelanda Ngumpul Belanja Dynasty.

Uda nya, Menteri Muda Dagang Temuai, Seni enggau Main Asal Datuk Lee Kim Shin, Menteri Muda Pemansang Orang Indu, Ruang bilik enggau Anak Mit ke mega Adun Bekenu Rosey Yunus, Adun Telang Usan Dennis Ngau enggau Adun Piasau Datuk Sebastian Ting bela meri geran RM10,000 siku.

Bela datai Residen Miri Haji Mastapa Haji Julahi, Direktor Pengereja Pengawa Dynasty Hotel Tony Pui enggau Chairman Pelanda Ngumpul Belanja Dynasty 2019 Stanley Gena.