Enti ukai kitai, nadai orang bukai ti ulih mantu sida lebuh sida ditinggang penusah

“Aku nemu mayuh kitai ti udah lama netap diri diau ba mengeri tu, lalu kitai patut mantu bala ti baru mindahka diri kitu lebih agi bala nembiak ti agi belajar ke mengeri tu.”

KUCHING: Peranak Lawas dilalau anang enda ingatka penatai diri taja kitai jauh ba menua orang, ku Sapit Kepala Menteri Datuk Amar Awang Tengah Ali Hasan.

Awang Tengah ke mega Menteri Industri enggau Pemansang Pengawa sereta Menteri Kedua Pemansang Nengeri enggau Pengeraja Asal madah taja jauh ari menua orang, kitai patut sama mantu pangan diri laban nya endang tanggungpengawa kitai.

“Aku nemu mayuh kitai ti udah lama netap diri diau ba mengeri tu, lalu kitai patut mantu bala ti baru mindahka diri kitu lebih agi bala nembiak ti agi belajar ke mengeri tu.

PEMERI RAYA… Awang Tengah nyuaka duit raya ngagai bala anak mit ti sama bisi datai ba Pengerami Badudun, kemari.

“Enti ukai kitai, nadai orang bukai ti ulih mantu sida lebih agi lebuh sida ditinggang penusah,” ku iya.

Awang Tengah madah munyi nya rambau bejaku ba Pengerami Badudun Audilfitri ti diatur Gerempung Peranak Lawas di Kuching bepalan ba siti hotel tebilang ditu, kemari.

Nangkan nya, ku iya, kitai ti diau ba mengeri orang tu nyadi ‘duta’ ngagai menua kitai empu.

“Kitai patut nyaga basa, kaul sereta adat kitai lebuh begulai enggau orang bukai.

“Nya alai aku ngarapka raban gerempung tu seruran meri komitmen ngagai bala bukai taja aku nemu tanggungpengawa tu ukai muntang,” ku iya.

Awang Tengah mega madah, taja nadai begaji, tang lebuh kitai mantu orang dalam penusah, Petara mega nemu mantu kitai baru.

Rambau Pengerami Badudun Aidilfitri nya, urung 600 iku peranak Lawas sama ngulu pengerami nya.

Kelimpah ari nya, sama bisi datai bini Awang Tengah Datuk Morliah Awang Daud, Speaker Dewan Undangan Nengeri Datuk Amar Mohamad Asfia Awang Nassar sereta bini iya Datuk Fatimah Iskandar.