Empat parti nyenggala ngining Dun Dudong

SIBU: Dua parti komponen GPS ti bela ngining penuduk sitak Dun Dudong maya Pengawa Bepilih Nengeri Ke-12 (PRN12) tu nyangka tau ngasuh GPS ‘pedis pala’.

Empai lama, Chairman Parti Sa’ati Rayat Sarawak (SUPP) pati Dudong Wong Ching Yong terang madahka diri andal amat parti sida ulih menang bediri minta pilih dia maya PRN12.

Ku iya, nitihka penemu dikemeran GPS, Dudong tu endang penuduk asal sereta dipenggi SUPP.

Taja pia, ba hari ke sebaka (8 Jun), Parti Progresif Demokratik (PDP) lebuh ngatur pengerami Ngiling Bidai enggau Pengerami Pemesai Begulai Enggau Rayat di Rumah Monica Gelima, Sungai Durin mega mandangka diri bisi ati nganjung manuk sabung sida ngagai kelang nya.

Presiden sida Datuk Seri Tiong King Sing besilup jaku ngining penuduk nya ari semaya deka ngagihka belanja penyampau RM100,000 ari iya empu kelimpah besemaya ngungkupka RM100,000 agi ari perintah nengeri nengah Program Transformasyen Menua Pesisir (RTP) dikena ngemanahka Rumah Monica.

Wong Ching Yong

Iya mega ngasuh Chairman PDP Dudong Kaunsilor Teo Boon Siew ‘bejalai’ ngiga rumah panjai di Dun nya ti patut diberi ungkup dikena ngemanahka agi rumah panjai sida.

Ari jaku silup nya, tampak amat mandangka PDP deka ‘bekimpin’ di Dun Dudong.

Pengingin ati PDP tu nyenggala agi dipeda bepun ari jaku Teo ti minta ketuai parti ngambi pulai baru ‘hak’ sida ba Dun Dudong maya PRN12 tu.

Ba penemu iya, penuduk Dun Dudong endang ari kelia enggi PDP lalu patut ditan.

Taja pia, dua parti tu bela empai terang madahka sapa bagi chalun ti deka disabung ba penuduk nya.

Datuk Seri Tiong King Sing

Sepengudah berita tu diayan ba surat berita, bisi penemu ba laman rama madah, enti sida (PDP) amat megai prinsip GPS, sida iya enda patut madahka diri ngining penuduk Dudong laban kitai semua nemu Dudong endang asal iya dipegai kaban GPS, SUPP.”

Ku penemu nya, Dun Dudong dipegai pengari ari Parti Bersatu Rakyat (UPP) ti diatu bekalih nama Parti Sarawak Bersatu (PSB) jarang ngabas rayat dia ngujungka mayuh parti bukai nyengkaum komponen parti GPS enggau Parti Bansa Dayak Sarawak Baru (PBDSB) nyau ngining penuduk nya.

Ba PBDSB, manuk sabung ti dipelabaka deka disabung sida ba kelang nya Sekretari Besai PBDSB, Julius Enchana.

Sebedau PDP enggau SUPP bela madahka diri bisi ati bediri minta pilih dia, Julius endang udah lama bejalai ‘ngirai’ diri ba Dun nya.

Naka ke udah nyengala ditemu, PDP, SUPP enggau PBDSB, parti bukai nyangka bela gagit nganjung manuk sabung sida.

Tang naka diatu, penuduk nya dipegai PSB, Datuk Tiong Thai King.

Tiong ari PSB sebedau tu ngena nama UPP, bediri dia bepun ari atur chairman Barisan Nasional (BN) nengeri suba, niang Tan Sri Pehin Sri Adenan Satem rambau PRN11 ti ngemendarka chalun terus ari UPP ngarika BN.

Tiong menang enggau 9,700 iti undi ngalahka empat iku chalun bukai enggau majoriti 2,146 undi rambau PRN11, 2016.

Datuk Tiong Thai King

 

Julius Enchana
Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak