Penanggul ditapi Rh Baying teputar

LUBOK ANTU: Penanggul suntuk bekal ai ditapi peranak Rumah Baying Kumpang Langgir ditu mujur diputarka pengudah nerima bekal ai graviti ti tembu dipejalaika di baruh Projek Bekal Ai Menua Pesisir.

Tuai Rumah Baying Kadam madah sida chukup lantang laban udah bulih bekal ai asil ari projek tu mujur mutarka penanggul ti ditapi sida ngelama tu.

“Pemansut ai beresi ti meruan tu deka ngemuntangka pengawa ti dikereja sereta enda irau pasal pengelikun enggau pengerai kami,” ku Baying.

Iya mansutka jaku nya rambau Pengawa Bejadika Bekal Ai Graviti Rh Baying Kumpang Langgir ti dipenyadi Kaban Parlimen Lubok Antu Jugah Muyang, kemari.

Baying madah, sebedau tu 140 iku peranak ari 26 pintu rumah panjai urung 16 kilometer ari pasar Engkilili nya bepanggai ba pemansut ai ari sungai ke enda jauh ari rumah nya,

TERIMA KASIH YB… Jugah muka pala paip nyadi kelai bejadika bekal ai graviti di Rh Baying Kumpang Langgir, Engkilili kemari.

Ku iya, sida mega ngena sistem graviti dikena nyambung ai ari tangki terus ngagai rumah tang enda ngena system penapis ai.

Iya nambah, penanggul nyadi lebuh sungai ti nyadi pemansut bekal ai sida kamur tauka keruh kelebih agi pengudah ari ujan.

Pia mega, lebuh maya musim kemarau, peranak ngiga pemansut ai bukai laban ai dalam tong enggau sungai majak langkang.

“Penanggul bekal ai beresi tu ngenusahka peranak di rumah panjai berapa taun ke udah kelebih agi maya pengerami melah pinang, program perintah enggau rabat ,”ku iya.

Projek bekal ai graviti Rh Baying Kumpang Langgir ti ngena ungkus urung RM98,000 tu dipejalai peranak kampung ngena chara beripai enggau Opis Mineral enggau Geosains Malaysia.

Kelimpah ari nya, Jugah madah Lubok Antu tu sebengkah sitak ti bedau nerima perengkaguna penuh baka bekal ai beresi enggau jalai alun.

Nya alai, iya nesau perintah nengeri enggau perintah besai ngambi sama bejalaika tanggungpengawa nyendiaka perengkaguna ba konstitusyen iya.

“Kitai ngarapka sida bulih pengelantang lebuh bisi perengkaguna baka bekal ai tu,” ku Jugah.

Rambau pengawa nya Juga mega madahka bantu nyeruri atap Rh Baying Kumpang Langgir ngena ungkus penyampau RM130,000.

Jugah mega bisi nyuaka geran penyampau RM30,000 ngagai Komiti Pemaju enggau Pengelikun (JKKK) rumah panjai nya.

Sama bisi datai, Sapit Direktor Opis Mineral enggau Geosains Hillary Muyan rnggau Pemantu Pemesai Pelajar Pelilih Lubok Antu Jim Andrew Janggi.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak