SARATOK: Lebih 1000 iku datai ngerichahka pengerami Nemuai Ngiling Tikai diatur Wai FM enggau kerejasama JKKK Rumah Chenggie, Brayang Ulu Roban ditu, ujung minggu tu tadi.
Batang tuju pengerami nya meri peluang ngagai peranak dia bekelala enggau bala ‘deejay’ radio WaiFM Iban.
Pengerami tu udah dipenyadi Kaban Parlimen Saratok ti mega Kaban Kunsil Nengeri Krian, Ali Biju.
Ba jaku dipansutka iya, Ali madahka pengerami tu nyadi pelasar pemadu manah ngenataika penerang ngagai peranak diau di kandang menua pesisir nengah atur licha ti dikenatai ejensi perintah dikaul.
Tu nyengkaum licha ari Bomba, Ejensi Anti Dadah Nasional (AADK), Sitak Pemansang Pengawa Betanam Betupi Begulai (IADA), Polis DiRaja Malaysia (PDRM), Opis pengerai enggau Opis Menteri Dagang Dalam Menua enggau Pekara Bebelika Barang (KPDNHEP) sereta ejensi bukai.
Ku iya, atur pengerami dua hari berunggu, 21 ngagai 22 Jun nya ngemai enggau meransang rayat ngetanka main asal enggau adat dikemeran kitai di rumah panjai kelebih agi ngaul rebak baru nentuka kelai bansa tu enda mudah lenyau ngapa.
Ali mega madahka diri temegah ati meda pemanah sambut ukai semina peranak rumah panjai nya aja tang mega ari sida ti diau ngelingi sereta bala bukai ti datai ngulu pengerami lemai nya.
“Tu tanda sukung ngagai program diatur RTM nengah Wai FM Iban ngaul kerejasama opis enggau ejensi perintah ti meri pemaik ngagai rayat renggat baruh.
“Aku mega lantang ati disambut ngena chukup basa, diambat sida ti ngena gagung ari Raban Ngepan Iban (Gagung) SDNU Saratok, dipebasa nyadi tuai pengabang ngiling tikai malam tu,” ku Ali temegah.
Berebak enggau nya Ali udah ngemendarka geran sepenyampau RM40,000 ungkup pengelantang peranak Rumah Chenggie di baruh JKKK (RM35,000) enggau Biro Indu (RM5,000).
Ngelansa sekeda rintai pengerami, lemai Hari Lima, 21 Jun ke alai penatai bala krew enggau artis dientudika program bekelala enggau randau ruai sereta rekoding jerita tuai nyengkaum reharsel.
Muakka pagi Hari Enam diisi enggau aktiviti ngangatka isi, lumba rama enggau licha ari ejensi bekaul, nyengkaum beperesa pengerai ari Opis Pengerai, licha enggau mandangka chara ngerara api ari Bomba enggau licha pekara penguna ari KPDNHEP sereta licha pasal dadah ari AADK enggau licha ari IADA.
Seraya atur pengerami malam berengkah ari pukul 6 lemai enggau penatai bala pengabang enggau temuai ti bisi dikangau datai dientudi makai serumpu begulai enggau bala ketuai genturung pendiau.
Udah nya batang pengerami ‘Ngiling Tikai’ enggau Panggau Pemerindang ari bala artis sereta bala ‘deejay’ Wai FM Bagi Iban.
Sama datai Ketuai Penulung Direktor RTM Zulkifli Mohamad, bala ketuai raban bansa sereta bala bukai.
