KUCHING: Raban Ngepan Iban (RNI) sekali agi deka ngatur Pekit Keling & Kumang RNI Tikas Nengeri Sarawak 2019 kena 3 Ogos di Betong.

Presiden RNI, Steven Abas Patrick Agus madah temuai dipebasa dipelaba ngulu pekit kepenudi tu ila iya nya Sapit Kepala Menteri Sarawak, Datuk Amar Douglas Uggah Embas.

Malam final deka diatur ba Dewan Tan Sri Datuk Amar Stephen Kalong Ningkan lalu sida deka diakim 15 iku akim.

Nitih penerang, bisi 14 penyereta indu enggau 14 penyereta lelaki udah dipilih ngarika pelilih menua diri.

Naka tu, RNI bisi ngatur pekit penau ba Miri, Sibu, Betong enggau Kuching.

SAMPAL DATAI… Presiden RNI, Steven Abas Patrick Agus (dua kanan) begambar kenang enggau sekeda komiti enggau finalis ke udah mujur dipilih.

Bala finalis deka dibai ngagai Aiman Batang Ai Resort ungkup aktiviti Malam Pengelandik Main Asal ditangkan enggau sesi ‘indoor judging’ sebelum pulai baru ke Betong.

Berebak enggau nya, bela diatur iya nya ‘Pageant Week’ dikena nelebaka bala finalis sentang konsep ngepan Iban, main asal enggau lebih silik.

“Pekit tu ukai semina ngakim ari sukut pemajik, tang mega ngiga penyereta ke ulih nyadi pengari dudi hari,” ku Steven maya aum pemberita di Saradise, ensana.

Tu beguna amat dikena ngiga orang ke bepenau ngelakuka main asal lebih agi ngepan Iban ngagai dunya luar.

Keling enggau Kumang RNI tu ila deka nerima perais RM5,000, pakej bemalam enggau kemisi, barang kosmetik nyaga mua enggau ke bukai.

Raban komiti pekit meri besai terima kasih ngagai raban sponser pekit iya nya Aiman Batang Ai Resort & Retreat laban udah nyendia perais ke chukup besai ungkup taun tu.

“Nya alai, aku nesau mensia mayuh bela sampal datai ngemataka Pekit Keling & Kumang RNI Tikas Nengeri Sarawak 2019’ kena 3 Ogos,” ku Steven.