MATU: Belanja penyampau RM10 juta udah diagih dikena nyeleti Rumah Panjai Melanau Kampung Sok ditu.

Tuju agih belanja tu mega dikena ngetanka pesaka asal raban bansa Melanau kelimpah nyadi palan pematak temuai.

Kaban Kaunsil Nengeri (Adun) N.44 Jemoreng Datuk Dr. Juanda Jaya nyemetak madahka agih belanja nya dikena manah nyeleti ramu rumah Melanau ti semina tinggal sebuah nya aja di Sarawak.

Kenu ku Juanda, tu sebagi ari inisiatif Perintah Sarawak dikena ngetan enggau nyeleti sekeda palan sejarah ti bisi di nengeri tu.

“Puji Tuhan laban Perintah Sarawak udah ngemasukka Rumah Panjai Melanau kependui di Sarawak tu dalam rintai ngambika diseleti.

NGABAS… Datuk Dr. Juanda Jaya enggau bala bukai ngatur pejalai ngabas rumah panjai Melanau.

“Aku mega deka meri besai terima kasih ngagai Direktor Muzium, Suria Bujang enggau sida sebuat laban udah kiruh datai kitu lalu ngabas gaya pendiau rumah panjai tu lebuh bulan Ramadan nyin tadi.

“Aku mega bisi dipadah piak Muzium Sarawak udah ngagihka urung RM10 juta ba taun baru dikena bejalaika pengawa ngintu iya,” ku iya madah ngagai pemberita pengudah ngulu pengawa Bejadika Masjid Pelilih Matu, ujung minggu tu tadi.

Ku Juanda, sebengkah randau bela diatur begulai enggau peranak dia nentuka sida meretika pemaik besai ari pengawa tu ungkup timpuh panjai.

Kelimpah ngetanka pesaka asal nya ku iya, sekeda pengawa deka dipelaba deka dipejalai nyengkaum ngerintaika iya dalam rintai palan ditapatka temuai di baruh Gerempung Pelajar, Saintifik enggau Main Asal Pertubuhan Bangsa-bangsa Bersatu (Unesco).

“Piak Muzium Sarawak udah madahka kitai ke alai pengudah tembu diseleti rumah panjai tu ulih direjista di baruh Unesco lalu inisiatif tu deka matak penatai temuai entarabansa datai kitu.

“Tu mega deka ngemai pangka manah kelebih agi ngagai peranak ditu. Nya kebuah aku ngansak sida meri kerejasama tegut nentuka pengawa tu ulih dipejalai lanchar agi,” ku iya.

Ngelansa pasal pengawa nyeleti perabung begunan nya ku Juanda, projek deka dirumban bekenaka agih belanja Program Transformasyen Menua Pesisir (RTP).

“Kitai ngagihka sekeda agih belanja RTP ari sanding penemu Opis Kereja Raya (JKR), dulu agi nyeleti perabung nentuka ramu bukai ulih dijaga ari repuk diempa ujan enggau panas.

“Piak muzium enggau tim sida mega setujuka perabung patut diseleti dulu sebedau pengawa bukai dipejalai enggau silik,” ku iya nerang.

MAKAI SERUMPU… Datuk Dr. Juanda Jaya enggau sida sebuat dinah pemakai rambau pejalai ngabas rumah panjai Melanau nya.