KUCHING: Kus matih 2,687 pengajar ngajar subjek Matematik enggau Sains ngena Jaku English di Sarawak dipelaba berengkah September tu.

Menteri Pelajar, Sains enggau Pansik Teknologi Dato Sri Michael Manyin Jawong madahka ‘training of trainers’ (ToT) nya deka diembing bala pengelicha Palan Pematih Pengajar (IPG) berebak ba semua IPG ditu.

“Kus diatur pengelama dua minggu tang ukai tembu naka nya aja lalu deka seruran dipejalai laban kami deka nentuka program tu mujur,” ku iya.

Iya mansutka jaku nya lebuh dirandau ngarika Abang Johari bejadika Aum Besai Pengatur Pekara Pelajar Serakup Prinsipal Sekula Sekondari Sarawak Ke-54 ditu tadi.

Sama datai Direktor Opis Pelajar Sarawak Dr Azhar Ahmad enggau Chairman Serakup Prinsipal Sekula Sekondari Sarawak Abang Othman Abang Masagus.

Kenu ku Manyin, Opis Menteri Pelajar diatu benung nyendiaka modul nyengkaum ari pekara belanja ungkup ToT nya, ti deka dipejalai di nengeri tu.

Ku iya, latih nya beguna amat nentuka semua pengajar ti ngajar subjek Matematik enggau Sains ulih ngajar ngena Jaku English enggau lanchar.

Kebuah pia ku iya laban sebedau tu, lebih ari 50 peratus pengajar ti dilatih ngajar Matematik enggau Sains semina ngena Jaku Malaysia (BM).

“Nya alai kitai patut nentuka semua pengajar ngena Jaku English ngajar Matematik enggau Sains. Nya kebuah kami dekaka semua sida dipatih sebedau kitai bejalaika program tu,” ku iya.

Ba lansa bukai ku Manyin, pengawa bekenaka Jaku English ba Matematik enggau Sains di Sarawak taun baru semina deka berengkah diajar ngagai nembiak Primari Satu.

Taja pia ku iya, pejalai pengawa tu di baruh program, ukai polisi baka Program Ngajar enggau Belajar Sains enggau Matematik Dalam Jaku English (PPSMI) sebedau tu.

Nya alai ku iya, pekara tu patut diterima semua apai indai nentuka pejalai program tu mujur.

“Berundingka tu semina program, iya patut diterima apai indai lalu siku ari sida tu mantah ngujungka iya enda ulih dipejalai.

“Nya kebuah kami ngandalka semua apai indai nyukung laban tu peluang dikena ngemansang enggau ngerumban sida landik bejaku English,” ku iya seraya nambah, naka diatu nadai bantah nyenggala diterima ari apai indai pasal pejalai program nya.