KUCHING: Nadai salah sebengkah atur dipejalai enti udah ditetap bepelasarka undang-undang ku Menteri Muda ba Opis Kepala Menteri (Pekara Korporat) Abdullah Saidol.

Iya nyaut tanya pasal Kaban Parlimen patut mantaika penyampau reta sida ti udah dikemendar ba Aum Parlimen kena 1 Julai tu tadi.

Ku iya, endang patut dipejalai enti atur nya ngasi enggau ulih ngemanahka agi sistem gawa.

“Tang enti bisi tuju bukai baka politik ti ngembuan agenda belalai, atur tu tau dikumbai kitai enda lurus,” ku iya madah nyemetak.

Abdullah Saidol mansutka jaku nya rambau Pengerami Gawai Raya Unit Komunikasyen Perintah Sarawak (Ukas) begulai enggau bala pemberita sereta Pemesai Ngatur Kaul Mensia Mayuh 2019 ba sebuah hotel tebilang ditu, kemari.

KAUL RAT… Datuk Jakun Sugah (empat ari kiba) disempulang Abdullah Saidol (lima ari kiba), Datuk Norhayati Mohd Ismail (tiga dari kanan), Presiden Serakup Pemberita Sarawak (FSJA) Jacqueline Radoi David sereta Ketuai Kaul Mensia Mayuh Ukas Samuel Simon lebuh bejadika Pengerami Gawai Raya 2019 kemari.

Ku iya, tu ukai pekara baru di Sarawak laban udah dipejalai kenyau ari jeman niang Tok Nan agi nyadi Kepala Menteri.

“Tok Nan mega udah bejalaika sumpah intergriti ngagai semua kaban politik nyengkaum sekretari politik.

“Pengawa ditampung Kepala Menteri kitai diatu, Datuk Patinggi Abang Jogari Tun Openg, ke alai iya mega meransang kaban kabinet nengeri ngangkat sumpah intergriti ba penyalah makai suap,” ku iya.

Lebuh ngetuaika aum keterubah iya nyadi Kepala Menteri suba ku Abdullah, bala menteri kabinet tekenyit dipinta nyain surat sumpah enda ngereja penyalah ngaul intergriti nya.

Sarawak mega nyadi nengeri keterubah di Malaysia bejalaika sumpah intergriti enggau sumpah enda makai suap.

Nangkan nya, kandang dua hari ti udah, Aum Parlimen ngemendarka mosyen Kaban Parlimen patut mantaika penyampau reta sida nyengkaum bala penyakal.

Nitihka mosyen nya, genap Kaban Parlimen enda tau enda mantaika penyampau reta sida nyengkaum bini tauka laki, anak enggau pemegai amanah dalam Akaun Berkanun.

Akaun Berkanun nya patut dibantaika ngagai Yang Dipertua Aum Parlimen dalam timpuh tiga bulan ari haribulan mosyen nya dikemendar sereta salin diberi ngagai Komiti Nagang Pengawa Makai Suap Malaysia (SPRM).

Lis nama Kaban Parlimen ti udah mantaika penyampau reta sida deka ayan ba portal SPRM.

Sama datai Pemangku Direktor Ukas Datuk Norhayati Mohd Ismail sereta Ketuai Komiti Bepilih (SPR) Sarawak, Datuk Takun Sugah.