Ilang, nyabur enggau duku

KUCHING: Bai ati keran ngetanka senyata asal dikena bala bujang berani Iban nurun ngayau menya ngasuh Johnny Barangan, 45 taun, sanggup limpang ngajar anak lelaki enggau menantu iya ngambuh.

Apai enam anak datai ari Jalai Oya di Sibu madahka diri berengkah belajar ngambuh ari ajar apai iya empu dalam taun 1992 lalu iya bepegai ba jaku sempekat – duku, ilang enggau nyabur tu kelai daya idup bansa Iban.

“Aku belajarka penemu ngambuh tu ari apai diri empu, tau dikumbai pengawa tu ditampung kami sebilik ari aki ini menya.

“Berindik ari nya, aku ngepunka dagang lalu rejista enggau Krafjari Malaysia nyadi tukang besi baka ngambuh duku, ilang enggau nyabur,” ku iya ngelansa.

Kelai daya idup Iban

Johnny ngenang pun dagang diri lebuh dirandau Suara Sarawak nyerumba Sarawak Timber & SME’s Expo 2019 ba Palan Aum Borneo Kuching (BCCK) ditu, apin lama ke udah.

Nampung Penau

Ku Johnny, ulu ilang suah agi digaga ari tanduk rusa enggau kayu, nitihka peminta enggau pemisi dua bansa keraban tu lalu disimpai ngena wi ngambi tan sereta rapit.

“Sarung ilang tu suah agi digaga aku ari kayu tebelian lalu ulu ari tanduk rusa. Belebuh mega aku ngaga sarung enggau ulu ari kayu gerunggang sereta bansa kayu bukai.

“Simpai ulu enggau sarung duku, ilang enggau nyabur endang digaga ari wi laban beratika peneguh enggau pengerapit kepit ba kereban ti disimpai ngena iya,” ku Johnny nerang.

ALUS… Ilang enggau Nyabur bisi dipandang enggau dijual Johnny nyerumba Sarawak Timber & SME’s Expo 2019.

Johnny mega bisi numbuhka sebuah bengkel di Sibu sereta bisi nerima bantu ari perintah.

“Aku bisi bengkel kediri di Sibu lalu bisi nerima bantu belanja ari perintah dikena meli injin sereta suah dikangau nyereta program baka tu.

“Ba atur program baka tu aku suah mantaika senyata tajam ti dikambuh enggau ditengkebang ngena pengelandik diri empu ke alai senyata tu suah dikena bujang berani menya nurun bekayauka bala munsuh.

“Nyauka genap tubuh sida ti meli muji enggau madahka asi jari aku chukup alus enggau manah dipeda sereta manding dikena ngelagu rumah,” ku iya nampung.

Nangkan nya ku Johnny, abis nadai 20 bilah duku enggau ilang ulih dikambuh bepanggai ba peminta makit.

PEMILIH… Pemanah ukir sarung enggau gaya penajam mata duku dikambuh Johnny.

Ku iya, rega duku enggau ilang meda enda sebaka bepelasarka penajam mata enggau kereban dikena ngaga.

“Ambika chunto, ulu duku digaga ari tanduk rusa deka mar agi rega laban ngira pemar ngulihka tanduk rusa.

“Pia mega enti ulu digaga ari kayu tebelian enggau kayu gerunggang mega enda sebaka rega kelimpah pemanah ukir enggau bungai ba mata enggau ulu.

“Urung RM5,000 asil ari dagang senyata diulih aku dalam sebulan lalu sida ti meli ukai semina datai ari menua tu aja.

“Bisi sekeda datai ari Semenanjung nyengkaum menua sepiak baka Brunei enggau Indonesia,” ku iya temegah.

SENYATA BUJANG BERANI… Gaya nyabur enggau ilang nyadi senyata bujang berani ngayau munsuh menya.

Nembiak rebak baru diatu mayuh enda nemu pasal bansa senyata asal Iban enggau pemesai guna iya ba pengidup kitai.

“Nya kebuah aku keran amat ngajar anak enggau menantu nampung pengelandik enggau penau ba pengawa asal tu nyengkaum bala nembiak bukai ti bisi ati belajar.

“Bisi sekeda sida belajar ngukir enggau nyimpai sarung, nunu besi enggau niup ngena peputan sereta ngambuh enggau nyepuh duku enggau ilang.

“Tebal agi sida tu enda puh enggau liat ati ngereja pengawa sereta enggai pedis, enda nakar angat daing api sereta enda sikar laban pengawa tu ukai ulih tembu sehari dua.

“Nya alai aku naka ulih ngajar anak lelaki enggau menantu diri empu ngambuh ngambika keresa enggau pesaka kitai tu enda mudah lenyau diseruyut jeman,” ku iya andal.

Johnny kala nerima Anugerah Hari Kraf Renggat Nasional 2012, menggi gelar champion Pekit Kraf Kategori Besi enggau Anugerah Basa Khas-Tukang Ulung Hari Krafjari Nasional 2011.

Pengangkun enggau pengeran iya ngangkatka senyata asal udah diaku sereta diangkat nyadi pesaka asal bansa Dayak Iban ti dikelala dunya.