PERAIS RM8,000 nganti pemenggi gelar Raja Sungai Rimbas nengah Regata Lumba Perau beserimbai enggau Pengerami Pusa 2019 berengkah ari 19 nyentuk 21 Julai tu.

Kesemua perais manggai RM40,000 deka diperebut bala pelumba perau ari selampur Sarawak.

Nitihka penerang Pemesai Pelilih Pusa Bujang Budin, pengerami dua taun sekali tu endang dianti peranak ditu, disadang atur pengerami richah agi taun tu.

Ku Budin, sida ti nyadi pengatur besai udah bejalaika pengawa rejista lumba perau lalu haribulan kepenudi rejista ditetap 12 Julai.

“Nya alai, sida ti bisi ati bepekit ngerebut gelar Raja Sungai Rimbas enggau perais RM8,000 patut tumu rejista nama diri.

NIKAL KENANG… Bala pelumba perau ngerichahka Pengerami Pusa 2017 di Sungai Rimbas.

“Dikearap Pengerami Pusa tu deka richah enggau lanchar sereta nerima sukung ari semua,” ku iya bejaku pengudah Aum Renggat Kedua Pengerami Pusa 2019 di Opis Pelilih Pusa, kemari.

Bujang ti nyadi penyanding penemu pengerami madah, lumba perau tu nanggam pun kaul entara mayuh piak ti ngemai reti besai ari ulah angkunka lumba enggau kerejasama tinggi entara sida ti bepekit ngayuhka perau.

Ngelansa enggau silik, lumba tu dibagi ngagai kategori Sakai 10, Sakai 15, Sakai 20, Sakai 25 enggau Sakai 30 ti bekayuh penyauh 1.85 kilometer.

Penerang ke silik pasal lumba tu tau telefon ngagai Ja’afar Yussup (016-9524274), Berahim Abang Bakar (019-5322971) tauka Mat Saini @ Jamir (013-8137197).

Nangkan nya, aktiviti bukai mega bisi diatur dikena ngerichahka agi pengerami tu.

Ku iya tu nyengkaum lumba rama, lumba rayat, sesais ngangatka isi, panggau pemerindang enggau ke bukai lalu bisi 100 pedaja disadang bejualka produk sida.

Penerang enggau tanya silik tau betelefon nuju Opis Pelilih Pusa ba lumur 083-465130.

Sama datai Pemantu Pemesai Pelilih Pusa Bujang Ladi enggau Sapit Ketuai PBB Pampang Beting Maro Awang Sarbini Gapor.