SRI AMAN: Menteri Muda Pengelantang Komuniti Datuk Francis Harden Hollis nyemetak madahka semua penguna anang ngerembaika berita bula ti nadai temu penatai sebedau ngasuh kitai charut.

“Semua rayat anang ngerembaika berita bula tauka enda temu ari ni penatai ba media rama laban pekara tu tau ngasuh charut.

“Kena manah servis online tu ngerembaika dagang kemaya hari enggau mansutka belanja,” ku iya ngelalau lebuh nutup Staying Safe Online Campaign 2019 di Hotel Seri Simanggang kemari.

Ku iya, nengah program nya ulih meri lalau ngagai penguna ngambi enda ngereja penyalah siber.

“Penguna ti alah dikemula sindiket nengah penyalah siber tau rugi besai baka kes Love Scam, Macau Scam enggau Nipu Kereja ngujungka penyalah bedagangka mensia.

“Penguna internet enggau servis online mayuh meri peluang ngagai pekara negetif kelebih agi sida ti nguji beambi ulih nipu enggau macham chara,” ku iya.

Berebak enggau nya, lebih 150 pengusung datai nyengkaum 123 penyereta pejalai sehari nyentuk diatur Opis Menteri Dagang Entarabansa enggau e-Dagang (MITeC).

Sama datai Pemesai Pelilih Sri Aman Mohd Ashree Wee, pengari KPD Sri Aman ASP Arthur Medang Mark Baran, pengari Residen Bagi Menua Sri Aman Ramon Addy enggau Sekretari Kaunsil Pelilih Sri Aman Joseph Phang Joon Foong.

KAUL KAMI… Datuk Francis Harden Hollis begambar ungkup kenang enggau bala komiti sereta penyereta program Staying Safe Online Campaign 2019 di Hotel Seri Simanggang ensanus.