KAPIT: Sepenyampau 34 nembiak Sekula Sekondari (SMK) Baleh ngatur pejalai nemuai seraya belajar ke Miri enggau Bintulu, apin lama ke udah.

Program belabuh 24 nyentuk 28 Jun diuluka Pengajar Wilson William disempulang empat pengajar sekula nya ke bukai.

Sida meleka tumu pagi ari sekula kena 24 Jun ngena ekspres datai di Kapit dua jam udah nya sebedau nampung pejalai napatka Sibu urung tiga jam pengelama.

Hari keterubah datai di Miri sida nemuai ngagai Grand Old Lady di Bukit kenada ditangkan Muzium Petroleum Miri.

Ngalihka lemai sida sebuat limpang nemuai ke Radio Televisyen Malaysia (RTM) Miri.

NEMUAI SERAYA BELAJAR… Nembiak SMK Balleh maya nemuai ngagai Asean Bintulu Fertilizer di Bintulu.

Hari nangkan nya, palan bukai ditapat sida baka Pustaka Miri, Institut Latih Pengawa Industri Miri, Giat Mara Miri, Taman Negara Niah enggau Tebing Tasik Tusan, Bekenu.

Di Bintulu, program nemuai dipungkal ba Taman TUMBINA, Kompleks LNG Petronas, ABG Bintulu kelimpah dibai berami ngintu Gawai Raya Petronas.

Taja enda lama nemuai, penjalai ngelawa dua bagi menua nya ukai semina nibak kenang manis enggau ninjau pemanah rampa menua aja tang ngerebak runding bala nembiak nimpai juluk ati ungkup pengidup menyana agi dudi hari.

Pengajar Wilson beterima kasih ngagai Sapit Kepala Menteri Tan Sri Dr James Jemut Masing, Kaban Parlimen Ulu Rajang Datuk Wilson Ugak Kumbong udah ngasuh juluk ati nembiak SMK Balleh nemuai ngagai kandang mengeri nyadi nyata.

NGIRI PENEMU… Bala nembiak sekula nya maya nemuai ngagai Pustaka Miri.

 

PENELEBA BEGUNA… Kompleks MLNG Bintulu siti ari palan ditapat maya nya.