BETONG: Status kereja fizikal projek ngintu enggau nyeleti Kubu Lili diatu udah manggai 14 peratus.

Kenu ku Menijar Projek Opis Kereja Raya (JKR) Wilayah Selatan Nur Aini Rosli, enti diperati ari tagit asal kitai bisi laun ari ditimpuh laban nitihka pematut kereja diatu udah manggai 19 peratus.

Bejaku rambau Bengkel Ngintu Kubu Lili di Kaunsil Pelilih Betong ensanus, projek dipelaba tembu Julai taun baru nengah kunteriktor TTP Industries Sdn. Bhd.

Kubu tu dirintai sebuah ari kubu tauka begunan ngundan sejarah ungkup Projek Ngintu enggau Nyeleti Kubu Lama di Sarawak ba Langgur Pemansang Malaysia Lumpar Ke-11 begulai enggau Kubu Emma (Kanowit), Kubu Hose (Marudi) enggau Kubu Brooke di Julau.

Ba lansa bukai, Pemesai Projek Ngintu enggau Nyeleti Kubu Lili Opis Muzium Sarawak (JMS) Norraha Abdul Rahim madahka sida diatu ngatur Bengkel Ngintu Kubu Lili begulai enggau JKR Sarawak.

Ku iya, tu sebagi ari skop projek dikena meri penerang ngagai sida ti dikaul terus nyengkaum bala ketuai raban bansa enggau rayat diau besemak.

“Bengkel tu nerang pasal chara kereja ngintu Kubu Lili ngena chara teknikal enggau silik agi ngambika pejalai pengawa ngintu baru begunan lama tu lanchar nitihka atur ti ditetap.

“Kelimpah ari nya, tu nyadi chara kitai ngasuh mensia mayuh meretika projek tu sereta nerima timbal ari sida nentuka projek tu meri pemaik enggau deka nyadi kelai baru menua Betong,” ku iya.

Ngelansa silik bengkel sehari setengah diisi enggau macham jurai baka projek nyeleti enggau ngintu Kubu Lili, sejarah enggau pemansang iya.

Batang jurai bukai pansik dilapidasyen enggau skop kereja, dokumentasyen ngintu begunan lama, pejalai enggau pemansang projek, pansik strukrur, pansik servis begunan enggau kereja nyambung tali karan sereta ngira enggau nyukat kereban nyengkaum ngira ungkus.

Ku Norraha, Kubu Lili ditumbuh dalam taun 1858 digaga ari kayu tebelian enggau bisi atap beringkat ti nyelai ngambi angin ulih masuk.

Langkar atap ti nyelai lalu nadai ba kubu bukai ti asal iya digaga ari daun apung, tang ditukar ngena kepin tebelian.

Lebuh jeman Brooke, begunan tu udah meda mayuh tipan jerita pengudah nyadi kubu matahka sekeda serang bujang berani Iban benama Rentap enggau bala iya.

Pengudah nya iya diubah nyadi opis polis enggau opis perintah sebedau badu dikena dataika ditempaya pia aja.

Projek tu deka ngubah enggau ngangkatka kubu tu nyadi rumah mijum ti deka mandangka sejarah enggau daya idup komuniti Betong.

Bengkel udah digulu urung 30 penyereta.