Enda ibuh bekelikuh, pekara nya nadai nyadika penanggul

KUCHING: Kepala Menteri Datuk Patinggi Abang Johari Tun Openg madah iya nadai ngasai ngundi ba umur 18 taun nya nyadi penanggul.

Ku iya, pekara nya udah dirandau bala sida Kaban Parlimen (MP) nyadi mensia mayuh enda ibuh bekelikuh pasal pekara nya.

“Aku enda ngasaika pekara nya nyadi isu laban ba menua bukai mayuh udah ngemeranka atur ngundi manggai umur 18 taun.

“Mayuh sida bejaku madah umur 18 taun tu kelalu biak tang enti menua udah nentuka baka nya kitai patut titih aja,” ku iya.

NERANG….Datuk Patinggi Abang Johari Tun Openg dirandau pemberita rambau program Nyua Bantu Petronas ngagai Nembiak Sarawak ba sebuah hotel tebilang ditu, kemari.

Abang Johari mansut pekara nya lebuh ditanya pemberita maya nyadi temuai dipebasa ngulu program Nyua Bantu Petronas ngagai Nembiak Sarawak ba sebuah hotel tebilang ditu, kemari Kelimpah ari nya, iya madah hak ngundi enggau enda nembiak nya tepulai ngagai siku-siku nembiak laban nya ukai pejal.

“Nembiak ti udah manggai umur 18 taun ulih milih sekalika ngundi tauka enda.

“Kitai idup ba menua demokrasyen nyadi tepulai ngagai nembiak nya empu deka ngundi tauka enda asalka nama iya udah bisi dalam rikod,” ku iya madah nyemetak.

Sentang pekara ngerejister ngundi Abang Johari madah iya rindu agi ngagai sistem automatik ngerejister ngambika enda ngiruh.

Ba pekara bukai iya madah, sentang reti orang biak baruh ari 18 taun iya madah pekara nya deka dirandau ba Kabinet dulu.

“Pekara tu deka diperundingka dulu ba Aum Kaunsil Nengeri,” ku iya.

Lalu ba pekara nyerumba jaku iya ti madah taja bebida bekaul enggau Petronas tang agi ulih bekerjasama Abang Johari nyaut bisi sekeda pekara minyak enggau gis ti agi dalam proses perunding.

“Kitai agi dalam proses berundingka ekuiti minyak enggau gis tang pengawa berunding tu benung dipejalai enggau manah.

“Diatu pemutus bedau ditemu agi, enti udah bulih pemutus ila aku deka madahka kita,” ku iya.