KUCHING: Opis Pengereja Pengawa (JTK) merambu deka ngatur Karnival Pengawa Puang (Karnival Kerjaya) khas ngagai Orang Nyelai Pendiau (OKU) enggau nembiak ti pansut ari palan pemulai pemanah ulah (pusat pemulihan).

Mandal Direktor JTK Sarawak Sulaiman Ismail madah pengawa tu diatur ngambika semua piak enda ngira ari ni penatai deka diberi peluang bulih pengawa di menua tu laban opis sida nagit ulih ngurangka pengaji bepanggai ngagai pekereja pengawa ari menua luar.

“Kami merambu deka berandau enggau Opis Pengintu Pengelantang Pendiau Raban Bansa (JKM) dikena nyidi bala sida OKU ti benung ngiga pengawa.

“Pia mega kami deka berandau enggau Ejensi Nagang Pengawa Gian Dadah Bansa (AADK) sentang pekara ti patut bekaul enggau orang ti pansut ari palan seridi kelimpah ngiga jalai awakka bala pengaji pechaya sida ti pansut ari palan tu,” ku iya.

Sulaiman madah munyi nya lebuh ditanya pemberita ba pengawa matau Karnival Pengawa Puang Malaysia di UTC ditu, kemari.

Ku iya, karnival tu diatur ba selampur Malaysia kemari lalu sida udah ngangau 20 bengkah serikat ngulu pengawa ti diatur ba mayuh bengkah pengawa puang ti setipak ba serikat sida.

“Kitai ngemeratka genturung Kuching enggau palan ti dampih ditu ngisi 1,324 iti pengawa puang sehari tu (kemari), bepun ari tikas pelajar Sijil Penilaian Menengah (SPM) nyentukka tikas Degree.

“Mayuh macham pengawa baka kereja tukang, servis enggau kedai endang dituju ngagai bala orang muda (golongan belia) ti setipak enggau peminta sida,” ku iya.

Pia mega, iya berasai positif ngadang nerima lebih 3,000 iku mensia mayuh datai ngulu karnival nya.

“Dipelaba urung lebih 3,000 iku mensia mayuh deka datai lalu tu nunjukka mayuh orang muda di Sarawak endang benung begigaka pengawa jeman kediatu.

“Aku ngarapka sida mujur intebiu lalu anang milih pengawa taja kereja ti diulih enda setipak enggau setipikit sida,” ku iya.

Karnival tu ti kelima udah diatur sida lalu JTK merambu deka bejalaika Jelajah Kerjaya Kenyalang (JKK) nangkanka tu ila.

Karnival ti sebaka kala diatur ba Mukah (23 Februari 2019), Lawas (9 March 2019), Kuching (28 March 2019) enggau Bintulu (6 April 2019).

JKK deka bepun ba Samarahan, Betong, Sibu enggau Miri dikena ngiga bala pengereja pengawa ti ‘bepotensi’ ba mayuh bengkah penemu, pengelandik enggau penau.

Kelimpah matau Sulaiman lalu meri setipikit penyereta ngagai 20 pengambi pekereja ti ngulu karnival nya.

Entara pengambi pekereja ti bisi ngulu karnival nya Aeon Co. (M) Bhd (Kuching Central Store), Borneo Specialist Hospital Sdn Bhd, Boulevard Enterprise (Kuching) Sdn Bhd, Coramax Mall Sdn Bhd, Everrise Departmental Store Sdn Bhd, KPJ Kuching Specialist Hospital enggau ke bukai.

Sama bisi datai Ketuai Bagi Menua Opis Servis Pengereja Pengawa JTK Sarawak Asmarina Othman.

SETIPIKIT…Sulaiman Ismail (kanan) nyuaka setipikit ngagai sebuah serikat ti ngulu Karnival Pengawa Puang Malaysia di UTC ditu, kemari.