INFO
Nembiak ngembuan ulah deka nemu ke chukup tinggi lebih agi maya umur manggai 12 taun

KUCHING: Rara jampat nyema apai indai bisi tepedaka anak salah guna tauka tepejuh meda video enda menuku ba telefon binching.

Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah madah, nembiak ngembuan ulah deka nemu ke chukup tinggi lebih agi maya umur manggai 12 taun.

“Sida mansang ngagai jeman bujang dara lalu maya nya hormon dalam sida nembiak berubah, ba jaku bukai sida tu dikumbai ‘baru lanjau’.

“Maya umur baru lanjau, sida tentu bisi ati ngagai pangan diri, pia mega sida ngasai penyelai maya betegu tubuh enggau ke bukai,” ku iya.

Fatimah madah munyi nya rambau dirandau ba Lorong Greenwood, apin lama ke udah.

Sebedau tu bisi kes anak mit beumur 12 taun masung anak ke dijaga indai iya beumur empat taun dipelaba ketegal udah meda video kamah.

Iya madah nembiak maya nya bedau panjai runding sereta enda nemu pangka ari ulah masung.

“Anak mit enda tetagangka ati sida lalu enda nemu ulah nya tau ngasuh sida kena ukum.

“Sida mega enda nemu ketegal meda video kamah nya ulih ngundang mayuh pangka negatif ngagai diri empu,” ku iya.

Nya alai iya ngelalau bala apai indai seruran matau anak maya meda telefon binching laban mayuh pekara ulih dipeda sida ari teknologi tu.

“Apai indai patut nerang ngagai bala anak sida pekara ke ulih dipeda enggau enda ngambi sida nemu bagi pekara ke betul enggau salah,” ku iya.

Sebedau tu, bisi kes nyadi ba Batu Gajah, Perak siku nembiak baruh umur ditemu masung anak mit.

Anak mit ti kena pasung dibai indai iya ngagai klinik ngambika diperesa laban madah diri pedis baruh kanda.

Indai iya terus betemu enggau ama ti nyaga lalu nanya saspek pekara nya, nembiak primari enam nya ngaku ngereja ulah ti enda menuku.

Ripot polis udah digaga, saspek ditangkap kena 2 Julai tu tadi.

Saspek diriman berengkah 2 ngagai 5 Julai lalu dipansik nitihka Seksyen 376 Kanun Keseksaan.