KUCHING: Sarawak nengeri keterubah ngena sistem ‘Interview Management System’ (IMS) dikena ngelimat jam ngatur intebiu enti penyampau tubuh orang minta pengawa kelalu mayuh.

Mandal Direktor JTK Sarawak Sulaiman Ismail madah IMS tu sebagi ari inisiatif opis iya empu lebuh napi peminta sereta ngatur orang ti ngiga pengawa puang ti majak mayuh jeman diatu.

“Kami ngemansangka diri empu sistem IMS tu laban enggai ngena sistem manual baka suba ti begunaka jam ti lama sereta ngiruh.

“Enggau IMS pengawa bala kami lebih muntang, ngelimatka jam enggau nyamai laban rikod dalam sistem udah disimpan,” ku iya.

Sulaiman madah munyi nya lebuh ditanya pemberita ba pengawa matau Karnival Pengawa Puang Malaysia di UTC ditu, pagi tadi.

PENGGI NUAN…Sulaiman Ismail (kanan) benung nyuaka setipikit ngagai pengaji ti bisi ngulu Karnival Pengawa Puang Malaysia di UTC ditu,pagi tadi.

IMS tu deka mantis baka data individu, tikas pelajar, kereja ti dipinta, sereta data bukai ari pom ti diisi sida sekali aja sebedau dikangau intebiu.

Ku Sulaiman, IMS tu ngasuh pengawa sida lebih sistematik sereta ngurangka penyekut lebuh mensia mayuh bededat ngulu karnival ti diatur sida.

“Kami deka ngasuh bala orang ngiga kereja ngisi pom sekali aja sebedau nuju ngagai komiti awakka ngisi data sida dalam IMS.

“Udah nya, IMS ulih nemu ni bagi pengawa puang ti dipinta sereta serikat ni ti deka dituju seraya orang nya nganti nama dikangau intebiu,” ku iya.

Sulaiman madah, ari IMS mega sida ulih meda penyampau bala orang ti ngiga pengawa puang ngerejister ba sebengkah karnival ti deka diatur udah tu ila.

Taja bedau kala digaga ba opis JTK nengeri bukai Sulaiman madah sida nadai penanggul deka bekunsika IMS tu ngagai nengeri bukai lalu seruran deka ngemansangka IMS ngambika lebih efektif enggau efisyen nangkanka tu ila.