KUCHING: Raban ti baru ngiga pengawa sigi enda patut kelalu milih pengawa laban sida empai mayuh peneleba.

Nya alai sida ke agi tu endang ngarapka pengaji ulih nerima sereta meri peluang ngagai sida maya intebiu.

Ku Margaret Kalim, 32 taun ari Sri Aman taja bisi batang pengawa diatu iya merambu deka ngiga pengawa ti setipak enggau tikas pelajar ti diambi iya.

“Taja endang bisi batang pengawa diatu, tang aku deka ngiga pengawa ti setipak enggau Diploma ti diambi aku maya sekula suba.

“Berasai rugi enti enda gawa nitihka ‘bidang’ ti diambi sereta ngansingka setipikit ti diulih kitai maya sekula suba enti enda dikena minta kereja ti manah agi,” ku iya ti madah ngambi kus Diploma ba Makmal Berubat.

Margaret Kalim

Taja pia, Margaret maya dirandau Suara Sarawak ba Karnival Pengawa Puang Malaysia di UTC ditu, kemari madah seraya minta pengawa ti dikedeka nadai salah endur kereja ba dini-dini endur ti bisi dikena ngiga peneleba.

Nangkan nya, Malvian Jun Fabian, 19 taun ari Serian madah iya endang benung begigaka pengawa kenyau empat bulan ti udah lalu.

“Udah tembu sekula ba Semenanjung aku pulai ke menua, bepun ari nya meh aku ngiga pengawa ditu.

“Taja ngambi kus Undang-undang Penerit Adat tang aku enda milih gawa asalka bulih pengawa,” ku iya.

Kelimpah ari nya, Avelyn Sugi, 28 taun ari Kapit madah iya pan deka ngiga kereja ti manah agi ari kereja iya empu diatu.

Malvian Jun Fabian

“Aku ngarapka diberi peluang gawa ba pengawa ti dikedeka aku lagi laban aku endang lama udah minta lalu bedau kala bulih pengawa nya.

“Engka laban makin mayuh orang nadai pengawa jeman diatu nya alai peluang bulih pengawa ti manah nya kurang,” ku iya.

Lalu Fifitasha James, 20 taun ari Sri Aman mega madah deka ngiga kereja ti muntang endur minta pemisi.

“Laban diatu aku gawa ngena ‘shift’ amat tusah deka minta pemisi kelebih agi musim pengerami.

“Kelimpah ngiga kereja ti manah agi, aku endang nagit pekara pasal pemisi dulu laban pemisi beguna lebuh pulai ke menua,” ku iya.

Avelyn Sugi

 

Fifitasha James