Padang Bilun Tanjung Manis dikemanah

TANJUNG MANIS: “Aku enda bejaku ngapa, nama utai ke disebut tentu dikeamat. Kitai mega ukai datai ngabas enda lama tang seruran datai ngelawa rayat,” ku Kepala Menteri, Datuk Patinggi Abang Johari Tun Openg.

Iya madah padang Bilun Tanjung Manis deka dikemanah agi dikena nyungkak pemansang ba sitak Delta Rajang enggau mayuh agi sektor bukai nyengkaum betanam betupi enggau dagang temuai.

madah, sebengkah pansik deka digaga dikena ngelala atur ke patut endur ngemanah Padang Bilun Tanjung Manis kelimpah ngemanah perengkaguna ke bukai.

Nengah inisiatif pemadu baru tu ku iya, perengka guna nya ukai semina nguntungka peranak Tanjung Manis tang mega meri pemaik ngagai mensia mayuh ke diau beserimbai pendiau enggau Pulau Bruit, Matu Daro, Pakan, Julau enggau Sarikei.

LUMBA RAYAT…Len Talif ngaringka buah nyiur beserimbai enggau lumba rayat seraya dikemataka Abang Johari enggau bala temuai bukai.

“Kitai tangkir agi padang bilun tu ngambika ulih endur bilun ke lebih besai baka ATR ke muat urung 90 iku penumpang.

“Pansik silik deka digaga taun baru, kitai deka madahka penyampau ungkus. Padang bilun tu deka nyadi pintu penama ngagai sitak Delta Rajang.

“ Tu ukai semina deka nyungkak sektor dagang temuai tang mega deka nyungkak sektor bukai nyengkaum betanam betupi enggau industri kampung,” katanya ketika menyempurnakan Majlis Perasmian Karnival Pantai Belawai di sini, hari ini.

Iya madah, pengawa nya sebagi ari perambu timpuh panjai dikena nyapai status Sarawak nyadi nengeri maju jemah ila.

Tambah mega ku iya, Tanjung Manis kandang menua ke besemak deka dikemansang nyadi sebengkah agi palan dagang temuai ke tau matak temuai ngagai kandang tengah menua Sarawak.

Kenu ku iya, agih RM3juta ke diberi Perintah Sarawak dikena ngemanah agi pantai Belawai mujur ngubah pendiau sitak nya nyadi sebengkah palan ke ulih matak temuai.

“Kelimpah dagang temuai, mayuh agi bidang bukai ke ulih dikemansang baka tenun kain kebat Rajang ke majak laku ba serata Malaysia. Kitai andal industri tu ngembuan makit ke chukup manah dudi hari ila,” ku iya.

Abang Johari madah, Perintah Sarawak tetap bebendar neruska projek ke ulih meri pangka besai ngagai rayat lebih agi ngagai sida ke diau ba menua pesisir.

Ku iya, entara pengawa ke dipejalaika Perintah Sarawak iya nya nyendiaka perengka guna elektrik ba menua pesisir nyengkaum ngagai rumah panjai kelimpah neruska projek perengkaguna pemun baka jalai enggau jematan.

“Tu mih ke ulih digaga kitai asil ari chukai jual minyak enggau gis, asil nya patut dikena manah ke pemaik rayat menua pesisir.

Sama bisi datai Menteri Muda Perambu Mengeri, Pengatur Tanah enggau Rampa Menua, Datu Len Talif Salleh, Menteri Muda Pekara Ehwal Korporat, Abdullah Saidol, Kaban Parlimen Tanjung Manis, Yusuf Abd Wahab, Kaban Kunsil Nengeri (Adun) Repok, Dato’ Sri Huang Tiong Sii, Adun Pakan, Tan Sri William Mawan Ikom enggau Adun Jemoreng, Datuk Dr. Juanda Jaya.