KUCHING: Perintah nengeri tu patut berundingka pengawa numbuh siti palan alai ngaga kereban betabuh iya ke diatu mayuh agi dibeli ari menua bukai.

Ketuai Akademi Sarawak Dayak Iban Association (Asadia) Mabong Unggang madah, pemanah kereban betabuh ke dibeli nya mega bisi kurang mimit enti dibida enggau kereban betabuh menua tu empu.

“Kami ngarap siti palan alai ngaga kereban betabuh baka tawak, bebendai, engkerumong enggau gendang ulih digaga ba menua kitai ditu.

“Ukai semina ngandalka ulih meli ari menua bukai tang pemanah kereban nya mega bisi kurang,” pia ku iya madah, kemari.

Bekaul enggau pengawa gerempung sida ku Mabong, nyentuk ke diatu sida mujur bedua penemu ngagai 1,300 iku belajarka macham bengkah main asal kenyau ke ditumbuh ba ujung taun 2013.

KENANG…Pengajar John Nuga (bediri, empat kanan) Mabong (bediri, tengah) begulai enggau penyereta kelas betabuh.

Iya madah, tuju penumbuh Asadia endang deka ngangkat sereta ngidupka main asal Dayak.

“Taun tu mega kami udah ngangkatka baru main Belikan,” ku iya nerang.

Ke pemadu baru, sida udah ngatur kelas betabuh kedua ungkup taun tu.

Serak tu bisi 10 iku ngambi bagi ba kelas betabuh ti diajar John Nuga iya ke landik ba macham bunyi tabuh.

Kelas nya diatur ba Joey Zumba Centre di Kota Padawan.

Kelimpah ari tabuh ajat, sida ke belajar bela diajar enggau tabuh ngambi indu enggau tabuh kuntau.

“Tuju kitai endang bebendar ngetan sereta ngerembaika main asal betabuh ngagai rebak baru diatu.

“Ba kitai, kitai andal amat main asal kitai baka betabuh tu tebilang sereta dikelala serata dunya dudi hari ila,” pia ku iya madah baru.

Asadia mega bisi ngatur kelas main asal bukai baka Ajat Indu enggau Lelaki Iban, Ajat Orang Ulu, Birejang Beuh (sebansa ajat Bidayuh ari Bau), Kelas Sape enggau Belikan, Kelas Kuntau, Kelas Ngaga Tangu enggau Kelas Ngaga Kain Burie.

Kelimpah ari nya, gerempung tu bisi kelas Ajat Indu, betabuh enggau gendang pampat ba Batu Gong Siburan.

Sapa ke bisi ati deka belajar ke main asal tau betelefon ngagai Mabong empu nengah lumur 012-6925562 tauka Henry Guya (019-8884370), Ngo Hawing (01119891420), Ozie Tunging (012-8821711) enggau Kilau Debis (014-2092481).