SIBU: Adat ‘muah’ sebengkah adat maya rabat raban bansa Melanau entara program manah ke deka dipandang rambau Pengerami Main Asal Borneo (BCF) ba Panggau Melayu/Melanau di Dataran Bandar Sibu Fasa I kena 18 Julai tu.

Sapit Chairman Komiti Panggau Melayu/Melanau BCF Nazatusyima Bujang madah, adat tu empai kala dipandang ba BCF sebedau tu.

“Taja BCF endang panggau main asal, tang berebak enggau nya uya deka mensia mayuh ingatka adat aki ini kitai kelia.

“Tebal agi adat baka tu nadai agi dipeda kemaya hari tu. Nyadi kitai mandangka iya awakka ulih ditemu mensia mayuh,’ ku iya ba aum pemberita di Wisma Sanyan, apin lama ke udah.

Dulu ari nya, Ibrahim betuaika aum nya lalu nerang pasal adat sesebengkah bansa di Sarawak.

“Nengah progrma tu ila, raban bansa Melanau ulih ngelala penatai asal sida, lebih agi sida ke nembiak,” ku iya.

Nya alai, Nazatusyima meransang mensia mayuh sampal datai ngemataka Panggau Melayu Melanau awakka ulih meda adat tu.

Udah nya, Ibrahim madah Panggau Melayu/Melanau deka berengkah 18 nyentuk 24 Julai tu.

Pengawa bejadika pengerami kena 21 Julai lalu Menteri Muda Pelajar enggau Pansik Teknologi Dr Annuar Rapaee disadang datai ngemujur pengerami.

SAMPAL DATAI…Ibrahim (duduk tengah), Nazatusyima (duduk, tiga kanan), Safree (duduk, tiga kiba) sereta kaban komiti ke bukai rambau aum pemberita nya.