KUCHING: Kaban Parti Gabungan Sarawak (GPS) maya tu enda ulih diau jenuh enti deka ngetanka Sarawak ari labuh ngagai pegai perintah bukai.

Kaban Parlimen Petra Jaya Datuk Seri Fadillah Yusof madah GPS patut ngetanka penuduk Sarawak tu agi dipegai GPS ba pengawa bepilih (PRN) ti deka datai.

“Kitai meseti bekereja kuat udah tu lalu anang semina diau jenuh enti deka ngetanka Sarawak ari labuh ngagai pegai perintah bukai.

“Dalam ngetanka hak Sarawak nengah Sempekat Malaysia (MA63) kitai patut bersatu awakka kitai enda nyadi sebaka baka di Semananjung diatu,” ku iya.

Fadillah bejaku munyi nya ba Pengerami Gawai Raya ba Balai Mensia Mayuh Haji Kamarudin Ahmad Kampung Segedup ditu, ensanus.

ANANG DIAU DIRI…Datuk Seri Fadillah Yusof (tiga kiba) begulai enggau Datuk Patinggi Abang Johari Tun Openg (dua kiba) nyirap pulut kuning ba Pengerami Gawai Raya ba Balai Mensia Mayuh Haji Kamarudin Ahmad Kampung Segedup ditu, ensanus.

Ku iya, di raban di Semenanjung diatu mayuh udah kesal enggau penyadi sida pengudah Pakatan Harapan (PH) nyilih perintah Barisan Nasional ba pengawa bepilih besai ti udah lalu.

“Taja pia sida nadai ulih ngaga nama-nama diatu laban meseti nganti dalam kandang lima taun endur pengawa bepilih besai digaga baru.

“Dalam kandang lima taun ti deka datai ila mayuh pekara ulih nyadi.

“Nya alai, ba PRN deka datai ila kitai meseti nentuka GPS deka mujur enggau begaya,” ku iya.

Ba pengerami nya Kepala Menteri Datuk Patinggi Abang Johari Tun Openg bejadi Balai Mensia Mayuh Haji Kamarudin Ahmad Kampung Segedup ti baru tembu apin lama.

Balai ti beungkus RM450 ribu nya diberi nama beserimbai enggau nama Ketuai Kampung keterubah Kampung Segedup Iya nya Haji Kamarudin Ahmad.

Sama datai bini iya Datuk Amar Juma’ani Tun Tuanku Bujang enggau Adun Batu Kitang Lo Ker Chiang serta bala bukai.