SIBU: Kaunsil Perambu Nengeri (SPA) udah ngemendarka taba dikena ngaga lima buah sekula entarabansa ke udah diperambu digaga di nengeri tu.

Menteri Muda Pelajar enggau Pansik Dr Annuar Rapa’ee madah, pengawa ngaga nya deka berengkah taun baru.

Kenu ku iya, sekula tu ila deka endur bala nembiak Pom 1 ke belajar ba International General Certificate of Secondary Education (IGCSE) enggau ngambi peresa Sijil Pelajaran Malaysia (SPM).

“Perintah nengeri udah madah pengawa ngaga lima buah sekolah entarabansa tu, dua di Kuching lalu siti ba Sibu, Miri enggau Bintulu.

“Berebak enggau nya, kitai udah bisi makmal dikena beratika kurikulum pelajar, pengajar sereta penau ke patut,” ku iya rambau bejadika Klinik Intensif Penyulut (KLIK) SPM Edisi Ke-6 2019 ba Universiti Kolej Teknologi Sarawak (UCTS) ditu, kemari.

NGEMERATKA PELAJAR…Dr Annuar (baris dua, tujuh kanan), Radin (baris kedua, lima kiba) begambar kenang enggau bala penyereta KLIK SPM.

Sama datai Pemesai Opis Pelajar Pelilih Sibu Radin Foji Radin Abdul Rahim enggau Chairman Gerempung Graduet Bumiputera Sibu (PGBS) Abang Fairul Syarmil Abang Mohd.

Iya ke mega Menteri Muda Pengawa Berumah enggau Pengerai madah, sekula entarabansa di Sibu udah diperambu ba Jalai Padang Bilun Lama.

Berebak enggau nya, iya mega muji pengawa PGBS bejalaika KLIK SPM lalu meri pemaik ngagai 1,620 nembiak sekumbang timpuh enam taun ke udah.

Nya alai, iya merambu ngasuh PGBS meri pemendar nyadi kaban besai ngagai nembiak ke udah ngambi bagi ba program KLIK SPM.

“Aku minta semua nembiak ke kala nyereta program KLIK SPM bela nyaup mantu nembiak bukai,” ku iya.

Dr Annuar mega besemaya deka meri insentif RM500 ngagai genap nembiak ke mujur masuk universiti enggau kolej.

Urung 280 nembiak pom 5 deka nyereta kelas tuisyen enda bebayar pengelama 10 minggu belabuh ari kemari nyentuk 29 September tu nengah program diatur PGBS begulai ebggau Opis Servis Dun Nangka enggau UCTS.