SERIAN: Ubah enggau pemansang deka matak temuai luar enggau ari menua tu datai ngelawa Serian.

Menteri Pelajar, Sains enggau Pansik Teknologi Datuk Seri Michael Manyin Jawong madah, ubah pemansang deka mantu ngerichahka agi pekara dagang temuai di Serian.

Ku Manyin, pengawa ngemanah menua nya deka berengkah pengudah Pesta Tasik Danu Serian tembu.

Ku Manyin, kaban Kaunsil Pelilih Serian patut beratika baru pelin pemansang ngelingi Tasik Danu ngambi ngemanahka agi sitak nya.

Manyin nambah, palan endur bemalam mega patut digaga mayuh dikena ngemuntangka orang luar ngelawa lalu bemalam di Serian.

“Main asal kitai ti nyelai ulih matak temuai datai kitu (Serian).

“Pengawa mandangka main asal patut dirintai nyadi aktiviti dalam pengerami Tasik Danu ke deka datai ngambi orang luar ngelala daya idup kitai,” ku Manyin madah.

Iya mansutka jaku nya beserimbai enggau pengawa nangguh Pengerami Tasik Danu Serian 2019 di Tasik Danu, Serian, ensana.

Manyin mega madah, penyereta ari selampur menua beguna amat enti dibanding perais pekit nya.

Iya nambah, penyereta ti mayuh tu ulih ngangkatka nama Sarawak enggau Serian ke serata dunya.

Ba pengawa nya, Datuk Seri Michael Manyin nyuaka trofi ngagai champion penuh pekit Serian International Remote Control Carnival ti dipenggi tim ari Kuching.

CHAMPION… Michael Manyin nyuaka trofi champion ngagai tim ari Kuching rambau pengawa nangguh Pengerami Tasik Danu 2019.