“Sigi amat endang mayuh orang landik sereta pintar bejaku. Tang majak mayuh sida bejaku, makin mayuh mega sida ngemedis ati orang ti mendingka utai disebut sida.”

Enti nuan deka nyadi orang tebilang, dikerinduka mensi mayuh sereta dipuji, siti ari pengelandik ke enda tau enda dikembuan iya nya pengelandik bejaku sereta berandau enggau orang bukai.

Mayuh orang diperati jereki sida bepanggai naka sida ngembuan pengelandik ke bansa tu.

Raban orang politik, Dj radio, penyual barang, pemerindang, pelakun, pakar motivasyen enggau mayuh agi ke bukai, semua sida tu idup penuh enggau pengelandik bejaku sereta berandau enggau sebarang aja orang. Pia mega sida bisi disempulang enggau pengelandik-pengelandik bukai.

Sigi amat endang mayuh orang landik sereta pintar bejaku. Tang majak mayuh sida bejaku, makin mayuh mega sida ngemedis ati orang ti mendingka utai disebut sida.

alvester bigol columnist

Mayuh orang ngumbai, asal aja kitai bejaku nya mih dikumbai komunikasyen.

Nyadi, sida nyangka enti kitai pandai bejaku. Reti nya tentu kitai tu pandai bekomunikasyen.

Nya kebendar enda amat. Munyiku penerang dalam bup ‘Seni Bercakap-cakap dan Berbual-bual’ ditulis Prof Emeritus Abdullah Hassan enggau Ainon Mohd.

Seduai madah, bejaku tu sebansa penau. Bisi orang ari mit udah landik bejaku. Tang bekomunikasyen ukai semina bejaku. Enda bejaku pan kitai ulih bekomunikasyen.

Ambika chunto, kitai diau diri pan nya tau dikumbai sebansa komunikasyen.

Sebaka enggau lebuh kitai bejaku, kitai kebendar deka madah sesebengkah utai. Maya kitai diau diri pan kitai kebendar bisi utai deka dipadah.

Pengelandik komunikasyen endang bepelasarka penemu dipelajar. Nya alai, ansah mih pengelandik bejaku sereta berandau baka kitai ti belajarka penemu-penemu bukai.

Nitihka penemu orang ti landik ba sentang psikologi, mayuh pekara nentuka pengelantang pengidup mensia, tang entara pekara-pekara ti meri pengelantang nya lumur satu iya nya pemanah kaul enggau orang bukai.

Pemanah kaul nya ulih digiga nengah chara kitai bejaku sereta berandau enggau pangan diri.

Bejaku enggau berandau ti bebasa entara dua iku orang ti enda kala ngelala pangan diri sebedau tu, tau nyadi manah sereta kemerah.

Nya mandangka pengelandik bejaku ulih nyikap semua pekara ti ngujungka pemanah kaul sereta ngelantangka ati mensia.

Kesatu, kitai begunaka pengelandik bejaku sereta berandau enggau orang bukai laban ari pemanah kaul nya mih ulih muai ati ti seilu-ilu, runggu ensing sereta sunyi nyema kitai nadai orang enggau berandau.

Kedua, kitai mensia meseti bejaku sereta berandau enggau orang bukai laban kitai begunaka peransang baik nya ungkup batang tubuh tauka ba sukut runding.

Nya alai, anang sanggu bejaku, berandau, muji, merindang tauka bebuti enggau pangan diri laban nya entara pekara ke chukup beguna dalam pengidup.

Ketiga, mensia patut bejaku laban ari jaku mega kitai tau bulih batang pengawa, pangkat, basa, pengaya, pengeraja enggau ke bukai.

Keempat, nengah pengawa bejaku sereta berandau mega kitai ulih bekunsi semua pekara ke manah enggau nasip jai ke kala nuntung kitai.

Nya alai, giga pansik penemu pasal pengelandik bejaku enggau berandau ngambika utai disebut kitai tau ngerindu, meransang sebarang orang ti mending, ukai sengapa sembur munyiku sempama tuai kelia ‘nibarka jala enda betating.’