SARIKEI: Anugerah Setipikit Beresi, Likun enggau Bepengerai (BeSS) tu sebagi ari inisiatif Opis Pengerai dikena ngangkatka kualiti servis pengempu pak makai.

Pemesai Pengerai Bagi Menua Sarikei Dr Emmanuel Joseph Fong madah, BeSS tu ngansak pedagang mela pemakai ti likun enggau bepengerai ungkup penguna sida.

Ku Emmanuel, setipikit tu beguna amat nentuka kualiti pemakai dibela pengempu pak makai ngagai mensia mayuh.

“Berebak enggau nya, bisi empat atur enda tau enda dititih sida sebedau diaku tu baka nyaga pemeresi pak makai, chara mela pemakai ti likun enggau bepengerai kelimpah pemayuh pemakai ti patut nitihka peminta,” ku Emmanuel nyerumba Pengawa Nyuaka Setipikit Ngaku BeSS di Palan Bedaja Sungai Sarikei, kemari.

Iya ngelalau pengempu pak makai di bagi menua tu nitihka atur ti udah ditetap ngambika sida bulih setipikit ari BeSS.

NYAGA KUALITI PEMAKAI… Pemesai Pengerai Bagi Menua Sarikei, Dr Emmanuel Joseph Fong mantaika lambang BeSS nyerumba Pengawa Nyuaka Setipikit Ngaku BeSS di Palan Bedaja Sungai Sarikei seraya dikemata staf bukai.

Ku iya, BeSS ti dikeluarka Unit Pengelikun enggau Kualiti Pemakai, Opis Pengerai Sarawak tu beguna amat laban deka nentuka pemeresi sida mela pemakai.

“Bisi dua pekara ti diaku BeSS iya nya pengelikun enggau kualiti pemakai sereta pekara bekaul pemakai.

“Ngambika diatu, pengempu kedai makai patut nitihka atur baka nyaga pemeresi kedai enggau nyual pemakai ti manahka pengerai,” ku iya.

Emmanuel madah nyentuk bulan Jun taun tu, bisi 26 buah pak baka bansal, kantin sekula, kantin fasiliti perintah, kafe hotel, pak ba genturung pendiau enggau kedai bukai ti diaku BeSS sereta agi bisi lisin (tiga taun) .

Nya alai ku iya, pengempu pak makai ti deka nemu penerang silik pasal BeSS tau telefon ngagai Opis Pengerai Pelilih enggau bagi menua ti beserimbai pendiau.

“Sida mega tau mantaika peminta nengah adres Opis Pengerai Bagi Menua Sarikei (Unit Pengelikun enggau Kualiti Pemakai), Ringkat Tiga Wisma Persekutuan, Jalai Bangunan Kerajaan, 96100 tauka betelefon ba lumur 084-651086 tauka fax : 084-654402,” ku Emmanuel.