KUCHING: Program HackWknd beserimbai enggau Aum Besai Entarabansa Ekonomi Digital (IDECS) 2019 nyadi sebagi ari aktiviti dikena nempa enggau ngerembaika penau nembiak ti deka nyadi pemungkal ngangkatka digital di Sarawak.

Pemansang penau digital di Sarawak nengah Kaunsil Multimedia Sarawak (SMA) nerima perati kenyau bejadika Strategi Ekonomi Digital Sarawak 2018-2022.

Program tu udah dipenyadi Sekretari Perintah Nengeri Sarawak Datuk Amar Haji Mohamad Morshidi Bin Abdul Ghani, di begunan Palan Aum Borneo Kuching (BCCK), ditu kemari.

Sama bisi datai bala penyereta ari selampur Sarawak baka ari Bau, Lawas, Miri, Sibu, Sri Aman enggau Kuching sereta penyereta menua bukai nyengkaum ari Pulau Pinang, Filipina enggau Mauritius.

Kenu ku Ketuai Kampung Digital SMA Hazwan Razak, program HackWknd tu aktiviti ke-9 udah diatur lalu kedua kali diatur beserimbai enggau IDECS.

KENANG MANIS… Tim ti nyadi champion dalam pekit HackWknd nerima perais ari Kepala Menteri Sarawak, Datuk Patinggi Abang Johari Tun Openg

“Tibak penemu HackWknd dikena nempa enggau ngerembaika penau ba menua tu bekenaka teknologi maya mutarka penanggul.

“Naka diatu, penemu tu udah ngerembai pengudah 167 penyereta datai lalu mantaika 58 prototaip.

“Mayuh alumni program tu udah mujur nibak penemu sida lalu pulai nyadi mentor enggau pematih penyereta renggat baru HackWknd enggau program pemansang bukai,” ku Manyin.

HackWknd tu mega ku iya beambi ulih ari IDECS 2019, “Envisioning Sarawak Future Living” tauka rambai jaku diambi ari e-dagang, revolusyen industri 4.0, Mengeri Pintar, Perintah Digital, Betanam Betupi Moden enggau Dagang Temuai Pintar.

“Bala penyereta bisi 48 dikena nengkebang chara mutar enggau nero penemu sida ba skim industri.

“Bisi 10 tim bebida deka besemekih ngerebut perais mata duit RM3,000 ungkup champion, lumur dua RM1,500 ketiga nerima RM1,000 seraya Anugerah Dipilih Mensia Mayuh nerima RM250.

“Semua penyereta HackWknd mega deka nerima kredit beungkus RM4,500 dikena ngiga rentayan Hab Inovasyen Digital selampur Sarawak.

“Program tu diatur ba Palan Warisan Kreatif Kuching (KCH) sebagi ari palan Digital ke baru, Hab Inovasyen dalam Ekosistem Kampung Digital Sarawak ti di baruh kuasa SMA.

“Batang tuju Palan Inovasyen Digital tu dikena nyendia penyikap bisi kualiti ngatur program enggau insiatif kelebih agi ngagai pemungkal enggau orang dagang tekno,” ku Manyin nerang.

Hab KCH tu jenama hab inovasyen ke baru ti nyelinting main asal, pesaka asal eggau kreativiti.

Datuk Amar Haji Mohamad Morshidi Bin Abdul Ghani madah, iya pechaya pesaka asal enggau main asal di Sarawak ti ngaul teknologi digital ulih nyendiaka pemun enggau identiti lebuh mansang ngagai ekonomi digital ti dipejalaika di Sarawak.

Iya nambah, program baka HackWknd dikearap ulih meransang nembiak ari selampur Sarawak dikena nengkebang penemu enggau mutar penanggul ngambika sida ulih nyukung strategi Ekonomi Digital.

Hackaton deka diatur pengelama 48 jam terus berengkah ari 6 ngagai 8 Julai 2019 lalu penyereta deka mantaika chara mutar lalu sida ti menggi gelar champion deka dipadah berebak enggau IDECS 2019 di BCCK berengkah ari 9 ngagai 10 Julai 2019.

SMA tu sebuah gerempung ti ditumbuh nitihka Seksyen 3 Ordinan Lembaga Multimedia Sarawak 2017 ngambi nyadi pemungkal, matau enggau ngemuntangka pemansang lalu ngatur komunikasyen, multimedia sereta Inisiatif Ekonomi Digital Menua.