KUCHING: Dagang bepelasarka buriek diatu majak nerima peminta ba makit industri kraf jari menua sereta nerima inovasyen tauka chara tengkebang baru.

Kenu ku Louis Kelaman, nengah dagang tu mega ulih nyungkak ekonomi pengemeran pengelandik jari kelimpah ngemai enggau ngangkatka nama menua gah agi ba tikas dunya.

Penyelai buah enggau langkar kerubung buriek ti ditusuk enggau dijait atas kain nentuka pugu rega makit jauh tinggi ari asil kraf jari bukai, manggai beratus ringgit selambar nitihka pemanah buah enggau pengalus jari, ti matak perati mensia mayuh.

“Ari selampai, baju dataika kain ditating ngena kerubung buriek enggau chura kain belachu chukup manding dipeda mata.

“Pia mega pekayan sida ke lelaki diatu udah berengkah nguing ngagai gaya buriek nipakka chara sida ke indu,” ku Louis ti nampung seni datai ari adap Batang Rajang.

Antin Buriek

Enti baka daja pemakai ku iya, enda apus hari endur utai daja laku, abis dijual. Baka nya mega dagang buriek tu, chukup laku.

“Kami sebuat ti bela ngemeranka pengelandik jari tu bela besaup nangkup peminta ngembing enggau ngatur bengkel nyait buriek dataika menua Brunei Darussalam.

“Diatu kami mega bisi nerima peminta ari bala menyadi di Kalimantan, Indonesia, enda nyengkaum di menua tu empu,” ku Louis nusui pengiruh diri lebuh dirandau Suara Sarawak.

Ngelansa pasal buah buriek ti suah ditusuk ku Louis, baka pengelandik jari bukai, buah ari anyam tikai enggau pua kumbu suah diangkat nyadi buah buriek.

“Taja pia kitai deka betanya dulu penemu sida ke tuai nyangka bisi pemali tauka penti enti ngangkat buah nya nitihka pengarap lama.

Gaun Buriek

“Nya kebuah kitai ngambi buah ti endang suah ditengkebang ungkup sida ti baru belajar nyait kerubung buriek dikena nyeliah sebarang penanggul bukai baka enda tuai bulu tauka nadai dinding bulu.

“Ambika chunto, buah paku kelindang, sumbuk tubu enggau ke bukai diajar maya bengkel enggau kelas buriek, tang enti ungkup jari diri sigi napatka buah ti mar tauka tinggi agi tikas,” ku Louis nambah.

Ku iya, diatu industri kraf jari jauh udah berubah nitihka singkang pemansang gaya pekayan nipakka peminta kemaya hari.

“Gaun tauka ngepan nyadi pilih sida ke indu, enda baka suba semina kain ditipak enggau baju dero enggau selampai buriek aja.

“Aku mega bisi nengkebang kereban penganta sida ke indu baka antin ari kerubung buriek dikena nipak gaun tauka ngepan ngambi manding agi dipeda.

“Taja macham gaya baru ti narit ati sereta nyadi pilih rebak baru tang enda ngelaungka buah asal kitai bansa Iban ti tetap dikerindu,” ku Louis madah nyemetak.

Ku iya, bekal kerubung buriek dibeli iya ari menua Bali enggau China laban menua kitar mar ngulihka bekal, tambah mega kerubung ari menua nya udah dibagi nitihka pemesai enggau chura.

 

Gaun Buriek

 

Tepa … Ayam jari Louis

 

Kain Buriek …. nunda buah pua kumbu

 

Louis Kelaman