KOTA SAMARAHAN: Apai indai patut nyadi malin bala anak belajarka Jaku Iban.

Pemesai Pemansik Yayasan Tun Jugah, Jantan Umbat madah raban bansa Iban diatu ulih dipeda nengah dua komuniti iya nya Iban ke agi diau mendam ba rumah panjai enggau Iban ke udah netapka pendiau di mengeri.

“Ba sida ti mengkang diau ba rumah panjai nyangka nadai penanggul ngena Jaku Iban laban nya endang nyadika batang jaku besehari sehari.

“Tang enti baka kitai Iban ti udah lama lalu netapka diri diau ba mengeri, nyangka bisi pedis mimit ngena Jaku Iban lalu nadai entu angkunka pengawa belajar Jaku Iban,” ku iya ngelansa.

Jantan mansutka penemu nya lebuh dirandau pemberita pengudah Ripin Seminar Dayak Chair Unimas bejuraika Jaku Iban: Pemansang enggau Pemar Ditapi Dudi Hari diatur di Fakulti Sains Sosial enggau Kemanusiaan (FSSH) Unimas ditu, kemari.

TIBAK PENEMU… Jantan Umbat lebuh dirandau pemberita di FSSH ditu, kemari.

Nangkan nya ku iya, nembiak rebak baru bansa Iban anang enggau ngerebut peluang belajarka Jaku Iban ba sekula.

“Enti diperati, jaku bansa kitai tu chukup benasip sereta nyulut agi laban diberi awak dipelajar ba sekula, enda baka jaku bansa bukai.

“Ambika chunto, jaku bansa Bidayuh empai ulih dipasuk ba sistem pelajar sekula laban jaku sida enda sebaka nitihka pelilih menua,” ku iya nampung.

Berebak enggau nya, Direktor Palan Matih Pengajar (IPG) Kampus Rajang, Dr. Lambat Lindong madahka naka ke diatu nadai makit bukai nipakka pelajar Jaku Iban.

“Nitihka ditemu aku diatu, semina Universiti Pendidikan Sultan Idris (UPSI) enggau IPG aja bisi nyendiaka pengawa ti nangkup peminta Jaku Iban, diangkat nyadi pengajar.

“Tang enti sema bisi pangku pengawa bukai setipak enggau pelajar Jaku Iban, nya pekara ti manah amat laban udah juluk ati kitai,” ku iya lantang ati.

Kelimpah ari nya ku iya, ba Sarawak bisi 675 buah sekula primari enggau 79 sekula sekondari nyendiaka pelajar Jaku Iban.

“Tu nyengkaum 74,022 nembiak enggau 2,245 pengajar ba sekula primari seraya 19,685 nembiak enggau 279 pengajar ba sekula sekondari.

“Tambah mega pengajar ti ngajar ngena Jaku Iban tu ukai semina kitai bansa Iban aja tang bisi pengajar bansa bukai ti nyulut lalu bepenau ngajar Jaku Iban ba sekula,” ku iya temegah.

Lambat madahka pekara tu chukup ngemegahka ati laban bisi bansa bukai ti angkun sereta rinduka Jaku Iban sereta besaup ngetan enggau ngangkatka Jaku Iban tu.